ҲАМАС гаровга олинган икки киши билан «алоқа узилганини» билдирди

Ҳамасчилар Исроилнинг Ғазо шаҳрига берган ҳаво ҳужумлари чоғида гаровга олинган икки киши билан «алоқа узилганини» даъво қилди. Улар ҳужумларни 24 соатга тўхтатишни талаб қилмоқда.

Фото: Dawoud Abu Alkas/REUTERS

ҲАМАС гуруҳи жангчилари Исроил мудофаа кучлари (ЦАҲАЛ) ҳаво ҳужумлари туфайли 2023 йил 7 октябрда гаровга олинган икки исроиллик билан «алоқа узилганини» даъво қилмоқда, деб хабар берди AFP ва Reuters. Уларга кўра, Фаластин гуруҳининг ҳарбий қаноти "Иззад-Дин ал-Қассам" бригадаси 28 сентябр, якшанба куни ЦАҲАЛнинг Ғазо шаҳрининг Сабра ва Тал ал-Ҳава ҳудудларида сўнгги икки кун ичида олиб борган амалиётлари ортидан исроиллик Матан Ангрест ва Омри Миран билан алоқа узилганини маълум қилган.

Reuters хабар беришича, ҲАМАС Исроилни «гаровга олинганларни хавфли ҳудуддан олиб чиқиш» учун маҳаллий вақт билан соат 18:00 дан бошлаб 24 соат давомида ҳаво ҳужумларини тўхтатишга чақирган.

AFP эслатишича, ҲАМАС аввалроқ Исроил ва АҚШ фуқаролигига эга бўлган гаровга олинган шахс билан алоқа узилгани ҳақида хабар берган, бироқ у бир неча кундан кейин қўйиб юборилганди.

Тайёрлаган: Отабек Матназаров

#Исроил #Ғазо #ҲАМАС

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.