Пентагон раҳбари ўз идорасининг ягона миссияси уруш эканини эълон қилди

Америка генераллари ва адмираллари Виржиниядаги Куантико денгиз пиёдалари базасида шошилинч учрашувга чақирилди, бу кўпчилик учун кутилмаган бўлди. Тадбирда АҚШ ҳарбий вазири Пит Ҳегсет янги ташкил этилган вазирликнинг асосий мақсади бундан буён уруш эканини таъкидлади.

«Шу пайтдан эътиборан, қайта тикланган ҳарбий вазирликнинг ягона вазифаси уруш олиб бориш, урушга тайёргарлик кўриш ва ғалабага тайёргарлик кўриш, тинимсиз ва муросасиз бўлишдан иборат», деди у.

Ҳегсет армиядаги ўнлаб йиллар давом этган таназзулни тугатишга ваъда берди, бунинг учун у аҳмоқ ва ақлсиз сиёсатчиларни айблади.

«Бундан буён армияда аёллар кўйлагини кийган йигитлар бўлмайди... Энди иқлим ўзгаришига сиғиниш, гендер сафсаталари йўқ. Бу ахлатга чек қўйилди», деди у.

Пентагон раҳбари, шунингдек, агар душманлар Қўшма Штатларга қарши чиқишга уринса, уларга «ҳалокатли зарба» билан таҳдид қилди. Унинг қўшимча қилишича, мамлакат «тинчликни ҳимоя қилиш» учун урушга тайёр бўлиши керак, пацифизм эса хавфли.

Шу билан бирга, Ҳегсет ҳарбий раҳбарларнинг жисмоний ҳолати қатъий назорат қилинишини таъкидлади.

«Пентагон ташқи кўриниш стандартларига риоя этилишини қатъий назорат қилади, ҳарбийлар жисмоний тайёргарлик тестидан 70 фоиздан юқори натижа билан ўтиши керак. Гап аёлларни ҳарбий хизматга қўймаслик ҳақида кетаётгани йўқ. Аёллар эплай олса, жуда яхши. Агар эплай олмаса, бу ҳам бор нарса. Агар бу ҳеч бир аёл баъзи жанговар вазифаларга мос келмаслигини англатадиган бўлса, шундай бўла қолсин. Пентагон залларида семиз генераллар ва адмиралларни кўриш мутлақо мақбул эмас. Бундан буён соқол, узун соч ва ўзини ифода этишнинг бошқа усулларига йўл қўйилмайди», деди у.

«Сиёсий жиҳатдан тўғри, ўта таъсирчан, ҳеч кимнинг кўнглини оғритишни истамайдиган раҳбарлик даври бундан кейин барча даражаларда тугатилади», деб қўшимча қилди Ҳегсет.

«Бу шошилинч лаҳза кўпроқ қўшин, кўпроқ ўқ-дорилар, кўпроқ дронлар, кўпроқ Patriot тизимлари, кўпроқ сувости кемалари, кўпроқ B-21 бомбардимончи самолётларини талаб қилади», деди у.

Унинг қўшимча қилишича, АҚШ кибермаконда, коинотда, шунингдек, учувчисиз учиш аппаратларига қарши кураш соҳасида куч тўплаши шарт.