OpenAI дунёдаги энг қиммат компания бўлиб чиқди 

Компаниянинг собиқ ва ҳозирги ходимлари инвесторларга тахминан 6,6 миллиард долларлик акцияларни сотган. Дастлаб акцияларни тахминан 10,3 миллиард долларга сотишга рухсат берган, бироқ кўпчилик бизнеснинг истиқболига ишонч билдирган ҳолда бундай қилмасликка қарор қилган. Бу ҳақда Bloomberg ва Reuters хабар бермоқда. 

Илгари компания тахминан 300 миллиард долларга баҳоланган эди. Акцияларни сотиш натижасида унинг қиймати Илон Маскнинг SpaceX компанияси қийматидан ошиб кетди. SpaceX тахминан 400 миллиард долларга баҳоланган бўлиб, ҳозир у рўйхатда иккинчи ўринда турибди. Учинчи ўринда эса TikTok эгаси бўлган Хитойнинг ByteDance компанияси ўрин олган. 

Бизнесмен Илон Маск 2015 йилда компания асосчилари қаторида бўлган. У 2018 йилда келишмовчиликлар туфайли компания директорлар кенгашини тарк этган. Маск 2025 йил бошида OpenAI’ни 97,4 миллиард долларга сотиб олиш таклифини билдирганди. Миллиардер 2024 йилда OpenAI’га қарши даъво қўзғатган. У компаниянинг тижорат бўлинмасини ташкил этиши ва Microsoft билан ҳамкорлик қилиши дастлабки мақсадига зид эканини таъкидлаган. 

Декабрь ойида OpenAI ҳужжат эълон қилиб, унда Маскнинг ўзи компанияни тижорат ташкилотига айлантиришни қўллаб-қувватлаганини очиқлаган. Бироқ Маск компания устидан назоратни қўлга кирита олмагани сабабли бу ғоядан воз кечган. 

Bloomberg’нинг таъкидлашича, OpenAI қийматининг ошиши сунъий интеллект соҳасидаги технология етакчилари атрофидаги “инвестицион қизиқиш”ни кўрсатади.

Масалан, сентябрь охирида чип ишлаб чиқарувчи Nvidia OpenAI’га тахминан 100 миллиард доллар миқдорида сармоя киритишини ва компанияга маълумот марказлари учун чиплар етказиб беришини эълон қилган.