ChatGPT ишлаб чиқувчиси дунёдаги энг қиммат стартапга айланди

Bloomberg ва Reuters маълумотларига кўра, OpenAI ходимлари ўз акцияларини сотганидан сўнг компаниянинг бозор капиталлашуви SpaceX'дан ўтиб кетди. Унинг қиймати ҳозир 500 миллиард долларга баҳоланмоқда.

Фото: AP

Сунъий интеллект технологиялари бўйича жаҳон етакчиларидан бири, Американинг OpenAI компанияси мултимиллиардер Илон Маскнинг SpaceX бозор капиталлашувидан ўтиб кетди ва дунёдаги энг қиммат стартапга айланди. 2 октябр, пайшанба куни Bloomberg ва Reuters агентликлари келишувдан хабардор манбаларга таяниб хабар беришича, ChatGPT ишлаб чиқувчиси ҳозирги ва собиқ ходимлари тахминан 6,6 миллиард евролик акцияларни сотганидан кейин 500 миллиард долларга баҳоланган.

Агентликларга кўра, харидор Thrive Capital, SoftBank Group, Dragoneer Investment Group, MGX ва T. Rowe Price каби инвесторлар консорциуми бўлди. Битим 2025 йил бошида SoftBank томонидан ўтказилган экспертиза давомида қайд этилган 300 миллиард долларлик аввалги баҳодан сезиларли даражада ошиб, компанияни дунёдаги энг йирик стартапга айлантирди.

Бир неча кун олдин The Information нашрида эълон қилинган ҳисоботда OpenAI'нинг 2025 йил биринчи ярмидаги даромади тахминан 4,3 миллиард долларни ташкил этгани, бу бутун 2024 йилга нисбатан 16 фоизга ошгани ҳақида хабар берилган эди.

ChatGPT ишлаб чиқувчиси матнли ботларда етакчи ҳисобланади ва шунингдек, бошқа СИ воситаларини, жумладан, автоматлаштирилган тасвир ва видео яратишни таклиф этади. Компания фонд биржасида рўйхатга олинмаганлиги сабабли, инвесторнинг кириши чекланмаган.

Илгари Илон Маскнинг SpaceX аэрокосмик компанияси дунёдаги энг қиммат хусусий компания ҳисобланар эди, унинг қиймати 350 миллиард долларга баҳоланган.

Тайёрлаган: Отабек Матназаров

#стартап #ChatGPT