Трамп «ҲАМАС»дан гаровга олинганларни тезроқ озод этишни талаб қилди

АҚШ президенти Доналд Трамп Фаластиннинг ҲАМАС ҳаракатини гаровга олинган барча исроилликларни тезда озод қилишга чақирди, акс ҳолда «барча таклифлар бекор қилинади».

«Мен кўпчилик эҳтимолий деб ҳисоблаган кечикишларга ёки Ғазо учун яна хавф туғдирадиган ҳар қандай натижага тоқат қилмайман», деб ёзди давлат раҳбари Truth Social ижтимоий тармоғида.

Доналд Трамп гаровга олинганларни озод қилиш учун Исроилнинг жанговар ҳаракатларни тўхтатиш қарорини қадрлашини қўшимча қилди: «Келинг, буни тезроқ тугатайлик. Ҳаммага адолатли муносабатда бўламиз».

АҚШ Ғазо секторидаги можарони ҳал қилиш бўйича 20 банддан иборат режани таклиф қилди. У барча гаровга олинганларни озод қилиш, ҲАМАС ҳаракатининг таслим бўлиши, Ғазо секторига инсонпарварлик ёрдамига рухсат бериш ва эксклавни вақтинчалик маъмурият назоратига ўтказишни ўз ичига олади. Исроилнинг N12 телеканали маълумотларига кўра, томонлар музокараларни 5 октябр куни Мисрда бошлайди.