Макрон 48 соат ичида янги бош вазирни тайинлаш ниятида

Франция президенти Эммануэл Макрон «48 соат ичида» истеъфога чиққан Себастен Лекорню ўрнига янги бош вазир тайинлаш ниятида. Бу ҳақда 8 октябр, чоршанба куни кечқурун Франция президенти девонига таяниб, AP ахборот агентлиги хабар берди.

Лекорнюнинг ўрнини ким эгаллаши мумкинлиги ҳақида ҳеч қандай маълумот берилмаган. Олдин Франция Мудофаа вазирлиги раҳбари лавозимида ишлаган, истеъфога чиққан бош вазир ўз лавозимида бор-йўғи 27 кун ўтказди. 5 октябр куни у асосан Макрон ҳукуматларида ишлаган сиёсатчилардан иборат янги вазирлар маҳкамасини тақдим этди. Бунга жавобан "Республикачилар" партиясидаги консерваторлар ҳукуматдан чиқиш билан таҳдид қилди, мухолифат – ўнг ва сўл қанот – президент истеъфосини талаб этди. Шу фонда Лекорню Макрондан уни лавозимидан озод қилишни сўради.

Францияда янги ҳукумат раҳбарининг зудлик билан тайинланиши, ҳозирча, мамлакатда навбатдан ташқари парламент сайловларининг олдини олади. Бундан ташқари, Франция Миллий мажлиси ҳали 2026 йил учун бюджет бўйича келишиб олгани йўқ ва унинг бундай шароитда тарқатиб юборилиши Европа Иттифоқининг иккинчи йирик иқтисодиётини янада катта ноаниқликка олиб келиши мумкин, дея таъкидлайди AP.

Макрон Лекорнюнинг истеъфосини қабул қилди, бироқ ундан парламентни тарқатиб юбормаслик учун палатада етарлича қўллаб-қувватловга эгалигини баҳолаш мақсадида Миллий мажлисдаги партиялар вакиллари билан музокаралар ўтказишни сўради, деб хабар беради AP. Лекорнюнинг хулосасига кўра, вазият мураккаб, аммо қуйи палатадаги «мутлақ кўпчилик» иккинчи тарқатиб юбориш сценарийсини рад этади.

Миллий мажлиснинг яна тарқатиб юборилишига муқобил вариант эса Макроннинг истеъфоси бўлиши мумкин, аммо Лекорню буни рад этди. «У (Макрон) Франциянинг хориждаги юзи», — дея расмийнинг сўзларидан иқтибос келтирилган. «Институт барқарорлиги сақланиши керак».

Лекорню сўнгги икки йил ичида Макрон томонидан тайинланган бешинчи бош вазир бўлди.