Трамп тинчлик бўйича Нобел мукофотини эгасидан тортиб олмаганини айтди

АҚШ президенти Доналд Трамп Оқ уйда журналистларнинг саволларига жавоб берар экан, бу йилги тинчлик бўйича Нобел мукофотини эгасидан тортиб олмаганини айтди.

Унинг сўзларига кўра, Нобел мукофотини олган киши (Мария Корин Мачадо) унга қўнғироқ қилиб, мукофотни ўзига бағишлаганини айтган.

«Мен унга: «Мукофотни бер», демадим. Ўйлашимча, у жуда илтифотли бўлгани учун бериши мумкин эди. Мен унга ҳар доим ёрдам бериб келганман, улар Венесуэлада ёрдамга жуда муҳтож», деди Трамп журналистларга.

Венесуэлалик мухолифатчи аёл Мария Мачадо ижтимоий тармоқда эркинлик ва демократияга эришиш иши Трамп ва бошқа асосий иттифоқчиларга боғлиқлигини ёзди.

«Мукофотни Венесуэланинг жафокаш халқи ва бизнинг ишимизни қатъий қўллаб-қувватлагани учун президент Трампга бағишлайман!», деб ёзди у.

Шу билан бирга, Америка президенти келаси йили ўзи узоқ кутган мукофотни олиши мумкинлигига ишора қилди.

«Умуман олганда, бу мукофот 2024 йил учун берилган, мен эса 2025 йилда лавозимга киришганман. Мен миллионлаб одамларнинг ҳаётини сақлаб қолганимдан мамнунман», деб хулоса қилди у.

2025 йил январ ойида Оқ уйга қайтганидан бери Америка раҳбари мукофотга «лойиқ» экани ва уни ўзига берилмаслиги «Қўшма Штатларни ҳақорат қилиш» бўлишини бир неча бор таъкидлаган.

Сентябр ойида Квантико базасида ҳарбийлар олдида нутқ сўзлаган Трамп шундай деган эди: «Мен Нобел мукофотини оламанми? Мутлақо йўқ. Уни ҳеч нима қилмаган бирор йигитга беришади».

Оқ уй 10 октябр куни президент Трампга мукофот берилмаганидан норозилик билдирди, чунки мукофот қўмитаси «сиёсатни тинчликдан устун қўйган».

Эслатиб ўтамиз, АҚШ президенти Доналд Трамп мукофотга асосий даъвогарлардан бири ҳисобланарди. Бироқ бу йилги тинчлик бўйича Нобел мукофоти лауреати Венесуэла мухолифати етакчиси Мария Корина Мачадо бўлди. Ослодаги Нобел қўмитаси «унинг Венесуэла халқининг демократик ҳуқуқларини илгари суриш бўйича тинимсиз ишини» эътироф этди.