Трамп ва Зеленский Украинага «Томагавк» ракеталарини беришни муҳокама қилди

АҚШ ва Украина президентлари Доналд Трамп ва Володимир Зеленский 11 октябр куни телефон орқали мулоқот қилди. Axios’нинг икки манбаси ушбу мулоқотда Американинг узоқ масофага учувчи «Томагавк» русумли қанотли ракеталарини Украинага етказиб бериш масаласи муҳокама қилинганини айтди. Нашр манбалари бу борада қандайдир якуний қарор қабул қилинганми ёки йўқлиги ҳақида маълумот бермаган.

Зеленскийнинг ўзи телеграм-каналида Трамп билан «суҳбат жуда самарали» бўлганини ёзган. «Ҳаво ҳужумидан мудофаамизни кучайтириш имкониятлари ва бу борада тайёрлаётган келишувларимизни муҳокама қилдик. Бизни ҳақиқатан ҳам кучайтириш учун яхши вариантлар, кучли ғоялар бор», – деди Украина президенти.

Зеленскийнинг сўзларига кўра, у Трампни Яқин Шарқ учун тинчлик режасини амалга ошириш жараёни бошлангани билан ҳам табриклаган. Бу «катта ютуқ» ва «кучли натижа», дея таъкидлаган Украина президенти. «Ва агар ўша минтақадаги урушни тўхтатиш мумкин бўлган бўлса, аниқки, бошқа урушлар, жумладан, Россия олиб бораётган урушни ҳам тўхтатиш мумкин», – дея қўшимча қилди Зеленский.

Аввалроқ АҚШ расмийлари Украинага учиш масофаси 2400 километрдан ортиқ бўлган «Томагавк» ракеталарини бериш имкониятини кўриб чиқаётганини маълум қилганди.

6 октябр куни Трамп «қандайдир маънода» Украинага узоқ масофага учувчи «Томагавк» қанотли ракеталарини етказиб бериш тўғрисида қарор қабул қилганини айтди. У гап қандай қарор ҳақида кетаётганига, Киев бу ракеталарни олиш-олмаслигига аниқлик киритмади.

Россиядагилар «Томагавк» ракеталарининг эҳтимолий етказиб берилиши эскалация келтириб чиқаришидан огоҳлантирган. Владимир Путин бундай қуролларни етказиб бериш Москва ва Вашингтон муносабатларини «бузиши»ни айтган.