Лондон "Лукойл", "Роснефть" ва "Мир" карталарига қарши санкцияларга киритди

Россиянинг Украинага қарши уруши давом этаётган бир пайтда Буюк Британия ҳукумати Россиянинг "Лукойл" ва "Роснефть" компанияларига қарши санкциялар жорий қилди. Бу ҳақдаги маълумот 15 октябр, чоршанба куни Британия ҳукумати расмий сайтида эълон қилинди. Шу куни жами 90 та янги жазо чоралари эълон қилинди.

Ҳужжатда айтилишича, санкциялар активларни музлатиш ва траст хизматларини кўрсатиш, транспорт операцияларини чеклашларни ўз ичига олади. Лондоннинг тушунтиришича, бу компаниялар «Россия ҳукумати учун муҳим аҳамиятга эга», хусусан, энергетика соҳаларида ишлайди. «Лукойл» ва «Роснефть» аввалроқ соҳавий чекловларга дучор бўлган эди.

«Роснефть» учун алоҳида чекловлар жорий этилди. Унга тегишли бўлган ёки бошқариладиган кемаларга энди Британия портларига киришга рухсат берилмайди. Бундан ташқари, «Роснефть» билан боғлиқ самолётларга Британия ҳаво ҳудудини кесиб ўтиш ёки қўниш тақиқланади.

Лондондаги ҳукумат баёнотига кўра, жами 51 та кема янги санкцияларга дучор бўлди: Россия нефтини ташувчи 44 та танкер ва суюлтирилган газ (СТГ) ташишда иштирок этган 7 та кема, жумладан Arctic LNG-2 лойиҳасидан. Уларнинг барчаси «Россия энергетика ресурсларини ташишда иштирок этган» деб тан олинган ҳамда суғурта, таъмирлаш, Британия портларига кириш ва Британия юрисдикцияси остидаги ҳар қандай операциялар тақиқланган.