Эркаклар аёлларга нисбатан тезроқ қариши илмий жиҳатдан исботланди

Ёш ўтиши билан эркакларда мия ҳажми аёлларга қараганда кучлироқ ва кўпроқ соҳаларда камаяди. Proceedings of the National Academy of Sciences журналида чоп этилган ва яқинда ўтказилган тадқиқот натижалари шуни кўрсатди.

Бу эса эркаклар аёлларга қараганда тезроқ қаришини, умр кўриш давомийлиги ҳам қисқароқ бўлишини англатади.

Шунга қарамай, аёлларда Алцгеймер касаллиги эркакларга қараганда деярли икки баравар кўп ташхис қўйилади ва бунда кексалик асосий хавф омилларидан бири сифатида қаралган эди. Янги тадқиқот бунинг шубҳали эканини, касаллик кўпроқ бошқа омилларга боғлиқлигини кўрсатмоқда.

Янги тадқиқот доирасида мутахассислар 4726 кишининг 12500 дан ортиқ мия тасвирларини магнит-резонанс томография (МРТ) ёрдамида таҳлил қилди. Ҳар бир иштирокчига ўртача уч йиллик оралиқ билан олинган камида иккита сурат тўғри келди.

Умуман олганда, эркакларда аёлларга қараганда миянинг кўпроқ соҳаларида ҳажмнинг сезиларли даражада камайиши кузатилди. Масалан, тактил, оғриқ ва ҳарорат сезгиларини қайта ишлаш, шунингдек, тананинг ўз ҳолати ва ҳаракатлари учун масъул бўлган постмарказий пўстлоқ уларда йилига 2,0 фоизга, аёлларда эса 1,2 фоизга қисқарган.