Трамп: Учинчи жаҳон урушига Украина сабабчи бўлмайди

Доналд Трамп икки ҳафта ичида Владимир Путин билан Будапештда учрашиш ниятида эканлигини маълум қилди. Унинг сўзларига кўра, АҚШ президенти «Европага ёрдам бериш» ва «кўпчиликнинг ҳаётини сақлаб қолиш» учун Украинадаги урушни тўхтатишга ҳаракат қилмоқда.

Фото: REUTERS

16 октябр, пайшанба куни Оқ уйда бўлиб ўтган матбуот анжуманида АҚШ президенти Доналд Трамп Россиянинг Украинага қарши уруши глобал можарога айланиб кетишига йўл қўймаслигига ишонтирди. «Менимча, бу учинчи жаҳон урушига олиб келиши мумкин. Лекин бу амалга ошмайди», — деди Трамп.

АҚШнинг амалдаги президенти Украинада кенг кўламли уруш бошланишида ўзидан олдинги президент Жо Байденнинг нотўғри сиёсатини айблади. «Украина Путиннинг диққат марказида эди, лекин у [Трамп президентлиги даврида] ҳеч қачон бундай ишни қилмаган бўларди. Бу ҳақиқатан ҳам нотўғри қарорлар қабул қилингани учун содир бўлди», деди Оқ уй раҳбари ва лавозимга киришгач, бу масалани «тўлиқ чалкашлик» деб топганини таъкидлади.

Трамп, ўз сўзлари билан айтганда, Украинадаги урушни «фақат одамларнинг руҳини сақлаб қолиш учун» тугатишга ҳаракат қилмоқда. «Мен буни биз учун қилмаяпман. Биз [Европадан] бир океан узоқдамиз. Мен Европага ёрдам бериш учун қиляпман. Улар уруш тугашини истайди, лекин буни уддалай олмаяпти. Лекин мен буни қила оламан. Ўйлайманки, муваффақиятга эришамиз ва кўп одамларнинг ҳаётини сақлаб қоламиз. Буни қилиш керак», — деди АҚШ президенти.

Шу матбуот анжуманида Оқ уй раҳбари Владимир Путин билан Будапештдаги учрашуви «эҳтимол икки ҳафта ичида» бўлиб ўтишини маълум қилди. Унинг айтишича, АҚШ давлат котиби Марко Рубио Россия ташқи ишлар вазири Сергей Лавров билан олдиндан учрашмоқчи. Россия билан музокараларда вице-президент Жей Ди Вэнс ва АҚШ президентининг махсус вакили Стив Уиткофф ҳам иштирок этади, деди Трамп.

Тайёрлаган: Отабек Матназаров

#АҚШ #Украина #Доналд Трамп