Луврдаги ўғрилик: полиция тўрт кишини қидирмоқда

Луврдаги ўғриликдан сўнг полиция саккизта экспонатни ўғирлаб, скутерларда қочиб кетган тўрт кишини қидирмоқда. Прокуратура ва Франция президенти Эммануэл Макрон тергов муваффақиятига ишонч билдирмоқда.

Фото: Gonzalo Fuentes/REUTERS

Франция ҳукумати Париждаги Лувр музейидаги ўғрилик билан боғлиқ бўлган тўрт кишини қидирмоқда, бу ҳақда 19 октябр, якшанба куни пойтахт бош прокурори Лора Беко маълум қилди. Франция ички ишлар вазири Лоран Нунес ўғриликни «жуда тажрибали гуруҳ» амалга оширганини айтди.

Беконинг сўзларига кўра, тўрт киши Франция тожи буюмлари сақланадиган Луврдаги Аполлон галереясида ўғрилик содир этган «кучли отряд»нинг бир қисми бўлган. Улар юзларига ниқоб тақиб, кучли скутерларда воқеа жойидан яширинган. Нунеснинг фикрича, улар хорижликлар бўлиши мумкин.

Дастлабки маълумотларга кўра, ўғрилар юк кўтарувчи машинадан деразани синдириш ва биринчи қаватдаги Аполлон галереясидаги мўлжалланган хонага тўғридан тўғри кириш учун фойдаланган. Бутун операция етти дақиқа давом этган, деди Нунес.

BFM телеканали ўғрилардан бири сариқ жилет кийиб, витринани синдиргани акс этган видеони чоп этди. Бу жилет ва скутерлардан бири кейинроқ полиция томонидан топилган.

Ўғрилар Наполеон ва Жозефина буюмлари коллекциясидан маржон, жиға ва диадема каби саккизта буюмни олган. Жиноят содир бўлган жойда тўққизинчи буюм — қимматбаҳо тошлар билан қопланган тож топилди. «Музей яқин кунларда ўғирланган нарсаларни қайтариб олишига шубҳам йўқ», — деди Париж бош прокурори. Унинг қўшимча қилишича, иш бўйича 60 га яқин терговчи ишламоқда.

Тайёрлаган: Отабек Матназаров

#Франция #ўғрилик #Лувр