Қўшимча функционаллар
-
Тунги кўриниш
Трамп: Урушни тугатиш учун Донбассни «бўлиш» керак
АҚШ президенти FT'нинг Зеленскийни бутун Донбассни Россияга беришга чақиргани ҳақидаги хабарини рад этди. Бунинг ўрнига, урушни тугатиш учун Украина минтақасини ҳозирги фронт чизиғи бўйлаб «бўлиш» керак, деди Трамп.
Фото: Alex Wong/Getty Images/AFP
Украинанинг Донбасс минтақаси урушни тугатиш учун «бўлиниши» керак, унинг катта қисми Россия назорати остида қолиши керак. Бу ҳақда АҚШ президенти Доналд Трамп 19 октябр, якшанба куни Россия-Украина урушининг тугаши юзасидан баёнот берди.
«Ҳаммаси қандай бўлса, шундай қолсин. У аллақачон бўлинган. Менимча, минтақанинг 78 фоизи аллақачон Россия томонидан қўлга киритилган», — деди Трамп Air Force One бортида журналистларга.
«Кейинчалик улар ўзаро келишувга эришиши мумкин. Аммо ҳозирча можаронинг ҳар икки томони фронтнинг олдинги чизиғида тўхташи керак — уйига қайтиши, жангларни тўхтатиши, одамларни ўлдиришни бас қилиши керак», — деди Оқ уй раҳбари.
Бироқ Трамп 19 октябр куни The Financial Times газетасида чоп этилган хабарни рад этди. Унда Зеленский билан учрашувда Америка президенти уни бутун Донбассни Россияга топширишга ундагани ва акс ҳолда Путин Украинани «йўқ қилишини» айтгани маълум қилинган.
Журналистлар билан учрашувда Трамп Ҳиндистон ҳақида ҳам фикр билдирди ва бош вазир Нарендра Моди Россия нефтини харид қилишни чеклашга ваъда берганини эслатди. Агар бу амалга ошмаса, Ню-Деҳли «катта божлар» тўлашда давом этади, дея қўшимча қилди Трамп.
