Рубио: янги санкцияларга қарамай, АҚШ РФ билан мулоқотга тайёр

АҚШ янги санкцияларга қарамасдан Россия билан мулоқотни давом эттирмоқчи. «Биз Россия вакиллари билан бундан кейин ҳам учрашишни истаймиз», — деди давлат котиби Марко Рубио журналистларга Европа вақти билан пайшанба, 23 октябр кечаси. «Агар тинчликка эришиш имкони туғилса, биз ҳар доим мулоқотдан манфаатдормиз», — дея у таъкидлади.

Бундан олдин АҚШ Молия вазирлиги Россиянинг энг йирик нефть компаниялари — «Роснефть» ва «Лукойл»га нисбатан санкциялар жорий этганини хабар қилган. Вазирлик раҳбари Скотт Бессент бу қадамни РФ президенти Владимир Путиннинг Украинадаги урушига чек қўйишдан бош тортгани билан изоҳлади.

АҚШ президенти Дональд Трамп Бессент баёнотини изоҳлар экан, Россияга нисбатан «кенг кўламли» санкциялар қисқа муддатли бўлишига умид билдирди. Шу билан бирга, у Украинадаги урушни тўхтатиш масаласида Россия президенти билан музокаралари «ҳеч қаерга олиб бормаслиги»ни таъкидлаб, Будапештдаги Путин билан режалаштирилган учрашувни бекор қилди.

Украинанинг АҚШдаги элчихонаси раҳбари Олга Стефанишина Вашингтон маъмуриятининг Россияга нисбатан санкцияларни кенгайтириш қарорини қўллаб-қувватлади. Унинг айтишича, бу қарор Украина позициясига тўлиқ мос: «тинчлик фақат куч орқали ва тажовузкорга нисбатан мавжуд халқаро инструментларнинг барчасини ишга солиб максимал босим ўтказиш билан» қўлга киритилиши мумкин.

АҚШнинг рус нефт компанияларига қарши санкцияларига бозор кескин ўсиш билан жавоб қайтарди — пайшанба кунги савдоларда нефт нархлари 3,5 фоиздан ортиқ кўтарилмоқда. Лондоннинг ICE Futures биржасида декабр фючерслари бўйича Brent маркали нефтнинг ҳар бир баррели соат 10:20 ҳолатига кўра 64,79 долларни ташкил этмоқда — бу аввалги савдолар ёпилишига нисбатан 3,51 фоизга юқори. Brent 10 октябрдан бери илк бор баррел учун 64 доллардан юқори нархда савдоланмоқда. NYMEX (Ню-Йорк товар биржаси) электроник савдоларида декабр ойига мўлжалланган WTI нефт фючерслари шу вақтга келиб 3,56 фоизга қимматлашиб, баррел учун 60,58 долларга етди.