ЕП: РФга қарши санкциялар — Сербиянинг ЕИга кириши учун шарт

Россияга қарши Европа санкциялар тизимига қўшилиш — Сербиянинг ЕИга аъзо бўлиши учун мажбурий шарт. Бундай резолюцияни Европа парламенти чоршанба, 22 октябр куни маъқуллади. 720 депутатдан 457 нафари «ёқлаб», 103 нафари «қарши» овоз берди, 72 нафари нейтрал қолди. ЕП резолюциялари ЕИнинг бошқа институтларига сиёсий позиция ва чақириқни ифодалайди, аммо бажарилиши шарт бўлган кўрсатма ҳисобланмайди.

Резолюция Сербиянинг Нови-Сад шаҳридаги фожиа (унда 16 киши ҳалок бўлган) санаcи яқинлашаётганига бағишланган. Шу воқеадан сўнг мамлакатда кўпсонли намойишлар бошланган эди. Европа парламенти норози бўлган фуқароларнинг намойиш ўтказиш ҳуқуқини қўллаб-қувватлади ва ҳокимиятнинг тарқатиш ҳаракатларини қоралади.

Евродепутатлар, шунингдек, Сербияда ҳукуматга бўйсунувчи ОАВ ва мансабдорлар томонидан олиб борилаётган «антиевропа ва руспараст пропаганда»га ишора қилди. Резолюцияда Сербияда эркин ва адолатли сайловлар ўтказишга чақириқ бор.

«Парламент Сербиянинг ЕИга аъзо бўлиш истиқболларига қатъий содиқлигини таъкидлайди, бироқ бу демократия, қонун устуворлиги ва асосий ҳуқуқлар соҳасида сезиларли тараққиёт, шунингдек ЕИнинг умумий ташқи ва хавфсизлик сиёсатига тўлиқ мослашиш ва Россияга қарши санкцияларга қўшилиш шарти билан», — дейилган матнда.

Резолюцияга кўра, ЕИ вакилларидан иборат делегация «жойига чиқиб вазиятни, шу жумладан демократия ҳолатини баҳолаш учун» Сербияга юборилади.

Илгари Сербия бир неча бор Россияга қарши санкциялар жорий этиш нияти йўқлигини билдирган. Президент Александр Вучич шундай баёнотлар билан 2025 йил июл ва август ойларида чиқиш қилган эди.

22 октябрдаги ЕП резолюцияси ҳақида Вучич ТАНЮГ агентлигига «унда патологик ёлғон бор», деб изоҳ берди. Сиёсатчининг сўзларига кўра, ҳужжат ортида Сербияда «рангли инқилоб» уюштиришга интилган Хорватия туради.