Ҳиндистон Россия нефти импортини кескин қисқартиришга тайёрланмоқда

Reuters агентлигининг 23 октябр, пайшанба куни саноат манбаларига таяниб хабар беришича, Ҳиндистон нефтни қайта ишлаш заводлари Россиянинг энг йирик икки ишлаб чиқарувчисига қарши АҚШнинг янги санкцияларига риоя қилиш учун Россия нефтини сотиб олишни сезиларли даражада камайтиришга тайёрланмоқда. Бу ҳаракат Қўшма Штатлар билан савдо битимига асосий тўсиқлардан бирини олиб ташлаши мумкин.

Ҳиндистон ҳозирда Қўшма Штатларга экспорт қилишда 50 фоизлик тарифларга дуч келмоқда, уларнинг ярми Россия нефтини сотиб олгани учун қасос сифатида жорий қилинган. Ню-Деҳли Россиядан хом нефт импортини босқичма-босқич камайтириш эвазига тарифларни бошқа Осиё мамлакатлари билан мослаштириши мумкин бўлган келишув бўйича музокаралар олиб бормоқда.

Россиянинг 2022 йилда Украинага тўлиқ миқёсда бостириб киришидан сўнг, Ҳиндистон чегирмали Россия нефтининг энг йирик харидорига айланди ва жорий йилнинг дастлабки тўққиз ойида кунига тахминан 1,7 миллион баррел импорт қилди.

Reuters агентлигига вазиятдан хабардор икки манбанинг хабар беришича, энг йирик хусусий компания ва Россия нефти асосий харидори бўлган Reliance Industries импортни камайтириш ёки бутунлай тўхтатишни режалаштирмоқда. «Россия нефт импорти ҳажмларини кўриб чиқиш давом этмоқда ва Reliance ўз ҳаракатларини Ҳиндистон ҳукумати кўрсатмаларига тўлиқ мослаштиради», деди компания вакили.

Масаладан хабардор манбанинг сўзларига кўра, давлатга тегишли Indian Oil Corp, Bharat Petroleum Corp ва Hindustan Petroleum Corp ҳам АҚШ санкциялари жорий этилгандан сўнг "Роснефть" ва "Лукойл"дан тўғридан тўғри маҳсулот етказиб берилмаслигини таъминлаш учун шартномаларни кўриб чиқмоқда.