Мерц "Роснефть"нинг ГФРдаги бизнеси учун санкциялардан истиснолар кутмоқда

Германия канцлери Фридрих Мерц "Роснефть" учун АҚШнинг янги санкцияларидан «истисно» берилишига ишоняпти. «Биз буни америкаликлар билан муҳокама қиламиз», дея Reuters Мерцнинг 24 октябр, жума куни кечқурун сўзларини келтирди.

Шу куни эрталаб Reuters Германия расмийлари "Роснефть"нинг Германиядаги шуъба корхоналарини АҚШнинг янги санкцияларидан ҳимоя қилишга ҳаракат қилаётгани ҳақида хабар берган эди. Ушбу хабарларга кўра, бир нечта банклар аллақачон АҚШ санкциялари уларнинг Россия нефт компаниясининг Германиядаги шуъба корхоналари билан бизнес юритишига тўсқинлик қилиши мумкинлигини таъкидлаган. Германия Иқтисодий ишлар ва энергетика вазирлиги Reuters агентлигига АҚШ санкциялари "Роснефть"нинг Германиядаги бизнесига таъсир қилмаслиги кераклигини айтди, чунки улар давлат назорати остида.

DW вазирликка АҚШ санкцияларидан "Роснефть"нинг Германиядаги шуъба корхоналарига таҳдид бор-йўқлигини аниқлаш учун ўз сўровини юборди.

Гап иккита немис компанияси: Rosneft Deutschland ва RN Refining & Marketing ҳақида кетмоқда. Россиянинг 2022 йилда Украинага тўлиқ миқёсда бостириб киришидан сўнг, Германия ҳукумати "Роснефть"ни улар устидан назоратдан маҳрум қилди ва уларни Федерал тармоқ агентлигининг ташқи ишончли бошқарувига ўтказди. "Роснефть" эгаликни сақлаб қолди. 2025 йил сентябр ойида Rosneft Deutschland'нинг ишончли бошқаруви яна бир йилга узайтирилди.

Rosneft Deutschland Германия нефтни қайта ишлаш қувватининг тахминан 12 фоизини назорат қилади. Компания Германиянинг учта йирик нефтни қайта ишлаш заводларида улушга эга: Шведтдаги PCK Schwedt, Карлсруэдаги MiRo ва Фобург-Дунайдаги Bayernoil.