Reuters: Хитой давлат компаниялари РФдан нефт сотиб олишни тўхтатди

АҚШ "Лукойл" ва "Роснефть"га санкциялар киритганидан кейин Хитой давлат компаниялари Россия нефтини сотиб олишни тўхтатди, деб хабар беради Reuters. Агентликнинг таъкидлашича, Ҳиндистон ҳам Россиядан ёнилғи импортини камайтириш режасига эга.

Фото: AP

Reuters 23 октябр, пайшанба куни савдо соҳасидаги «кўп манбаларга» таяниб хабар беришича, АҚШ "Лукойл" ва "Роснефть"га санкциялар киритганидан кейин Хитой давлат компаниялари Россия нефтини сотиб олишни тўхтатди.

Хусусан, бу PetroChina, Sinopec, CNOOC ва Zhenhua Oil компанияларига тегишли. Хабарларга кўра, улар ҳеч бўлмаганда қисқа муддатда потенциал санкциялар ҳақидаги хавотирлар туфайли денгиз орқали Россия билан нефти битимларидан воз кечмоқда. Шу билан бирга, Sinopec бўлинмаси- Unipec ўтган ҳафта Буюк Британия "Лукойл" ва "Роснефть"га қарши санкциялар жорий қилганида Россия нефтини сотиб олишни тўхтатди.

Шу билан бирга, Reuters агентлигининг маълумотларига кўра, Россиядан ҳар куни денгиз орқали импорт қилинадиган тахминан 1,4 миллион баррел нефтнинг катта қисми нодавлат нефтни қайта ишлаш заводлари томонидан сотиб олинади. Агентлик томонидан сўралган таҳлилчилар Хитой давлат компанияларининг харидлардаги улушини кунига 250 000 баррелдан 500 000 баррелгача баҳолайди.

Трейдерларнинг сўзларига кўра, АҚШ санкцияларидан олдин ҳам, иккита энг йирик нефт компанияси ўз нефтининг катта қисмини Хитойга тўғридан тўғри эмас, балки воситачилар орқали сотган. Бироқ, Хитой давлат компанияларидан ўрнак олиб, хусусий компаниялар санкцияларнинг потенциал таъсирини баҳолаш учун Россия нефтини сотиб олишни тўхтатиши кутилмоқда. Аммо савдо кейинроқ қайта бошланиши мумкин.

Тайёрлаган: Отабек Матназаров

#Россия #АҚШ #Хитой #нефт