Инфографика: Жидда минораси дунёдаги энг баланд бинолар билан таққосланди

Унинг баландлиги 1000 метрга етиши кутилмоқда ва лойиҳа Саудия Арабистонинг Vision 2030 миллий стратегияси доирасида шаҳарларини янгилаш ҳамда иқтисодни диверсификация қилишга қаратилган мақсадларини ифода этади.

Дастлаб “Подшоҳлик минорaси” (Kingdom Tower) номи билан танилган иншоот 2013 йилда Жидда иқтисодий шаҳри (Jeddah Economic City) каби йирик лойиҳа доирасида қурила бошланган — Жидданинг шимолидаги янги шаҳар маркази бўлиб, турар жой кварталлари, бизнес ва маданий масканларни бирлаштиради.

Молиявий ва логистик қийинчиликлар сабаб бир неча бор тўхтаб қолганидан кейин қурилиш қайта тикланди. Сўнгги маълумотларга кўра, бино тахминан 70-қаватга етган, ишларни якунлаш 2028 йилга мўлжалланган. Бу босқич замонавий меъморчиликнинг энг улкан лойиҳаларидан бири қайта жонланаётганини англатади ва у Дубайдаги Бурж Халифани ҳам сояда қолдириши мумкин.

Тайёр ҳолатида Жидда минораси ҳақиқий вертикал шаҳарга айланади: унда ҳашаматли апартаментлар, офис майдонлари, жаҳон даражасидаги меҳмонхона, кузатув майдончалари ва савдо зоналари жойлашади.

Унинг чиройли, аэродинамик силуэти ва учбурчак асосга эга тузилиши кучли шамол юкламаларига бардош бериш ва ички зўриқишларни камайтириш учун мўлжалланган — бундай кўламдаги бинога зарур муҳандислик eчими.

Инновацион меъморий ечимлар ва экологик технологиялар минорани янги авлод осмонўпар бинолари учун барқарор қурилиш намунасига айлантиради.

Жидда минорасининг қурилиши мегаполислар орасидаги янги рақобат даврини бошлади: шаҳарлар ўз манзарасини қайта кўриб чиқиш ва инвестицияларни жалб этишга интилмоқда. Лойиҳа минтақавий трендни ҳам акс эттиради: Яқин Шарқ давлатлари келажак инфратузилмасига қизғин сармоя киритиб, нефтга боғлиқликдан чекинишни мақсад қилган.

Масалан, 2025 йил октябр ойида Саудия Арабистони қиймати етти миллиард долларга тенг Land Bridge темирйўл лойиҳасини тақдим этди — у Жидда ва Ар-Риёдни боғлайди. Бу ташаббус подшоҳликнинг боғланувчанлик, модернизация ва глобал етакчиликка интилишини яна бир бор тасдиқлайди.