Ҳиндистоннинг энг йирик нефт концерни яна РФдан нефт сотиб олмоқда

Reuters маълумотига кўра, Indian Oil Corp (IOC) декабр ойида етказиб берилиши кутилган ESPO туридаги Россия нефтини AQШ санкцияларига тушмайдиган етказиб берувчилардан беш юк партияси ҳажмида харид қилди.

Фото: Biju Boro/AFP

Ҳиндистоннинг энг йирик нефт концерни Indian Oil Corp (IOC) Россия нефтини харид қилишни қайта бошлади. Савдо соҳасидаги манбаларга таяниб, 31 октябр куни Reuters хабар беришича, компания санкцияларга тушмайдиган етказиб берувчилардан декабр ойи учун беш партия нефт сотиб олган.

Жами харид ҳажми 3,5 млн баррел ESPO туридаги Россия нефтини ташкил этади. Агентлик таъкидлашича, бу — компания АҚШнинг Ҳиндистонга РФ нефтини импорт қилишни тўхтатиш талаби билан босим кучайтирганига қарамай, харидларни қайта йўлга қўйганини англатади. IOC молия директори Анудж Чайн илгари айтиб ўтганидек, концерн халқаро санкциялар бузилмаган тақдирда Россия нефтини сотиб олишни давом эттиради, деб эслатади Reuters.

АҚШ 22 октябр куни РФга нисбатан янги санкциялар жорий этди. Бунга «Москва бошлаб берган Украинадаги урушни тугатиш бўйича тинчлик жараёнига Россиянинг жиддий қизиқиши йўқлиги» сабаб қилиб кўрсатилди. Қора рўйхатга Россиянинг икки энг йирик нефт компанияси — «Роснефть» ва «Лукойл», шунингдек уларнинг Россия ҳудудидаги шуъба тузилмалари киритилди. Қоидаларни бузган тақдирда АҚШ фуқароларига ҳам, хорижликларга ҳам нисбатан фуқаролик-ҳуқуқий ёки жиноий чоралар қўлланиши мумкинлиги қайд этилган.

Шундан кейин Хитой ва Ҳиндистон Россия нефти импортини кескин қисқартиришга тайёрланаётгани ҳақида хабарлар тарқалган эди. Хусусан, РФдан Ҳиндистонга йўл олган икки нефт танкери АҚШ санкциялари эълон қилинганидан кейин курсини ўзгартиргани маълум бўлди: улардан бири Болтиқ денгизида орқага бурилган, иккинчиси эса Ҳиндистоннинг ғарбий қирғоқлари яқинида бир неча кундан бери сузиб юрибди.

Тайёрлаган: Отабек Матназаров

#Ҳиндистон #нефт