Полша ОАВ: “Очиқ Россия”нинг собиқ координатори ФСБ учун ишлаган

Украинага қарши Россия уруши бошлангач Полшада сиёсий бошпана олган ва ўзини мухолифатчи деб таништирган россиялик Игор Рогов бир неча йил давомида Россия Федерал хавфсизлик хизмати (ФСБ) билан ҳамкорлик қилиб келганини поляк терговчиларига тан олди. Бу ҳақда 3 ноябр куни WP Wiadomości ва PKB24 интернет-нашрлари Рогов ва унинг рафиқаси Иринага нисбатан қўзғатилган иш материалларига таянган ҳолда хабар қилди.

Полша терговчилари тайёрлаган якуний хулосага кўра, 2024 йил ёзида Полша Ички хавфсизлик агентлиги (ABW) томонидан қўлга олинган Рогов — аввал “Очиқ Россия” ҳаракатининг координатори ва Алексей Навалний штаби (Саранск) координаторининг ўринбосари бўлган — у ФСБ ходимига Ғарбга кўчган россиялик мухолифлар ҳақидагина эмас, балки россиялик муҳожирларга ёрдам бераётган поляк тузилмалари, Полша ТИВ амалдорлари фаолияти, россияликлар учун поляк тили ўқитувчилари ҳақида ҳам маълумотлар ўтказиб турган. Айтилишича, маълумотларни флеш-картада рафиқасига берган ва у ўша пайт Россияга қариндошларини кўришга борган.

“Менга ёқадиган ишни қилишим керак эди: россиялик мухолифат доираларида айланиш, янги одамлар билан танишиш ва охир-оқибат ҳаммасини ФСБга хабар қилиш. Мен кўпроқ яхшилик қиляпман, деб ўйлардим”, — дея Игор Рогов кўрсатмаларини келтирган WP Wiadomości. У, шунингдек, ўзини Украинадаги урушга сафарбар қилиш билан отасини қўрқитган ФСБ босими остида ҳаракат қилганини айтган: “Мен босим остида эдим, бу одамлар мен ҳақимда ҳаммасини билади, деб ўйлардим. Қўрқардим”, — деган у.

Бундан ташқари, тергов 2024 йил ёзида Полшадаги логистика марказида аниқланган посилка — бомба тайёрлаш компонентлари: нитроглицерин, пауэрбанк кўринишидаги детонатор ва кумулятив қисми бор металл термос қабул қилувчиси Игор Рогов бўлганини ҳам аниқлади. Роговнинг айтишича, у фақат посилкани олиб қўйиши керак бўлган, ичида нима борлигини билмаган, бу ишни ундан Полшада яшаётган россиялик мухолифатчи Эмил Г. сўраган. Рогов буни “оддий ёрдам” деб атаган.

Энди унга жосусликдан ташқари одамлар ҳаёти ва соғлиғига хавф туғдирганлик айби ҳам қўйилмоқда. Игор Рогов ва унинг рафиқаси Ирина Роговаларга саккиз йилдан умрбод қамоққача жазо берилиши мумкин.

Полша ОАВ ёзишича, Игор Рогов 2022 йил баҳорида Полшага келган. У ўзини мухолифатчи деб таништириб, Силезияда Владимир Путин ҳокимиятига қарши митинглар ташкил этганини айтиб юрган. Унинг сўзларига кўра, Варшава ҳукумати Россиянинг Украинага босқини бошлангач уни мамлакатга таклиф қилган. Рогов “информатика” ихтисослиги бўйича ўқишни якунлаган, ойига 5000 злотий стипендия ва ижтимоий ёрдам, шунингдек Сосновец шаҳрида ётоқхонада турар жой олган. Бироқ Полша Ички хавфсизлик агентлиги маълумотларига кўра, Рогов Россиянинг ўзидаёқ ФСБ томонидан ёлланган ва у билан фаол ҳамкорликни давом эттирган.

Терговда ҳал қилувчи нуқта Ирина Рогованинг кўрсатмалари бўлди: у эри бошқа бир россиялик муҳожир аёл билан муносабат ўрнатганини билиб қолгач, хусусий суҳбатларда Игор йиллар давомида Евгений исмли ФСБ ходими билан ишлашини айта бошлаган. Роғов у билан ҳамкорлик қилганини хотинига “университетнинг биринчи ёки иккинчи курсидаёқ” очиқ айтган ва ўшанда “Очиқ Россия” конференцияларидан ФСБ учун ҳисоботлар ёзганини таъкидлаган.

WP Wiadomości маълумотларига кўра, Игор Роговни назорат қилган ФСБ офицери Евгений айрим ҳужжатларда Евгений Литко сифатида қайд этилган, у гўёки Германияда яшайди ва у ердан Россия агентурасини бошқаради. Полша хизматлари унинг турган жойини аниқлашга урингани-уринмагани номаълум.

Игор Рогов иши — 2022 йилда мамлакатга кириб келаётган россиялик фуқаролар сони ортиши билан боғлиқ хавфлар ҳақида оғоҳлантирган поляк махсус хизматлари хавотирларининг яна бир тасдиғи, деб ёзади Полша ОАВ.