Исроил вазири яҳудийларни Ню-Йоркни тарк этишга чақирди

Диаспора масалалари ва антисемитизмга қарши кураш вазири Аммиҳай Шикли 34 ёшли мусулмон-демократ Зоҳран Мамданий Ню-Йорк мэри сайловида ғалаба қозонганидан кейин, шаҳардаги яҳудийларни ватанга қайтишга чақирди.

“Бир вақтлар умумий эркинлик рамзи бўлган шаҳар ҳокимият калитини 25 йил олдин Ню-Йоркнинг уч минг аҳолисини ўлдирган фанатиклар позициясидан унча фарқ қилмайдиган, ҲАМАС тарафдори қўлига топширди”, — деб ёзди Шикли 5 ноябр куни X саҳифасида.

Унинг фикрича, “Ню-Йорк энди ҳеч қачон аввалгидек бўлмайди, айниқса унинг яҳудий жамоаси учун”, шу боис улар “Исроил заминини янги уйи қилиш ҳақида жиддий ўйлаб кўриши” керак. “Ню-Йорк, Лондон жарликка очиқ кўз билан кириб бормоқда”, — деб қўшимча қилди Шикли.

Шаҳарда тахминан 1,3 миллион яҳудий яшайди — бу Исроилдан ташқари дунёдаги энг йирик яҳудий жамоати. Шу билан бирга, Мамданий Исроилдаги ҳокимиятни “апартеид режими”, Ғазодаги уруши эса “геноцид” деб атаган. Бироқ у ҲАМАС ҳақида алоҳида баёнот бермаган.

Шиклининг Мамданийга оид баёнотига Исроил миллий хавфсизлик вазири ва ўнг “Оцма Йехудит” (“Яҳудий кучи”) партияси раҳбари Итамар Бен-Гвир ҳам қўшилди. AFP унинг сўзларини келтирди: “Антисемитизм соғлом ақлни енгди. Мамданий — ҲАМАС тарафдори, Исроил душмани ва ашаддий антисемит”.

Шаҳар бошлиғи сайлови 4 ноябр куни бўлиб ўтди. Деярли 98 фоиз овозлар санаб чиқилгандан сўнг, Демократик партия ва “Ишловчи оилалар партияси” қўллаб-қувватлаган Мамданий 50,4 фоиз овоз билан биринчи бўлди. Иккинчи ўринда 41,6 фоиз овоз билан мустақил номзод Эндрю Куомо турибди, аввалроқ АҚШ президенти Доналд Трамп уни қўллаб-қувватлаб, у ютқазадиган бўлса, шаҳар молиялаштирилишини қисқартириш билан таҳдид қилган эди. Куомо 2011–2021 йилларда Ню-Йорк штати губернатори бўлган, кейин жинсий тазйиқ айбловлари ортидан истеъфо берган ва Демократик партия праймеризида Мамданийга ютқазган.

Трамп, шунингдек, сўл қарашли Мамданийни коммунист деб атаган. Президентнинг таъкидлашича, сиёсатчининг ғоялари шаҳарга зарар етказади. Хусусан, у ижара ҳақини музлатиб қўйиш, шаҳар автобусларида бепул юриш, умумий мактабгача таълим ва муниципал озиқ-овқат дўконлари тармоғини очишни таклиф этган. Мамданий бу лойиҳаларни бойлар ва компаниялар учун солиқларни ошириш ҳисобига молиялаштиришни режалаштирмоқда.