Қўшимча функционаллар
-
Тунги кўриниш
ОАВ: санкциялар “Лукойл”нинг хориждаги бизнесини фалаж қилиб қўйди
Reuters ёзишича, АҚШ ва Буюк Британия жорий этган санкциялар туфайли “Лукойл”нинг хориждаги тузилмалари фаолияти жиддий издан чиқди. Хусусан, Финландия, Швейцария ва Ироқда муаммолар келиб чиққан.
Фото: REUTERS/Ramil Sitdikov
Россиянинг хусусий нефт-газ компанияси “Лукойл”нинг хорижий тузилмалари октябр ойи охирида АҚШ ва Буюк Британия жорий этган санкциялардан кейин бизнес юритишда қийинчиликларга дуч келмоқда. Reuters агентлиги 4 ноябр куни манбаларига таяниб хабар беришича, муаммолар камида Ироқ, Швейцария ва Финландияда кузатилган.
Масалан, Ироқнинг давлат корхонаси Somo санкцияларга оид хавотирлар сабабидан мамлакат жанубидаги “Ғарбий Қурна-2” конларида “Лукойл” қазиб олган хом нефтнинг ноябр ойига мўлжалланган уч партияси юкланишини бекор қилди. Россия томони қуввати кунига 480 минг баррел бўлган ушбу кондаги акцияларнинг 75 фоизига эга, қолган 25 фоизи эса Ироқнинг North Oil Company давлат компаниясига тегишли.
Reuters манбаларига кўра, “Лукойл”нинг Женевада жойлашган савдо бўлими Litasco’да ҳам муаммолар бор. Санкциялар туфайли британ кемачилик брокерлари компания билан ҳамкорлик қилиш ва кема фрахтлашувида иштирок этишдан бош тортмоқда. Шунингдек, санкциялар жорий этилганидан сўнг Litasco қисқартириш ўтказгани қайд этилган, аммо қанча ходим ишсиз қолгани очиқланмаган.
Финландияда эса “Лукойл”га қарашли Teboil ёнилғи қуйиш шохобчаларида ишловчи тахминан 1000 нафар ходим яқин ҳафталарда иш ўрнини йўқотишидан хавотирда, чунки маҳаллий банклар компания тўловларини музлатишни бошлаган. Шу билан бирга, АҚШ Молия вазирлиги компанияларга “Лукойл” тузилмалари билан барча операцияларни 21 ноябргача якунлаш ҳуқуқини берган.
АҚШ Молия вазирлигининг Ташқи активлар назорати бошқармаси (OFAC) 22 октябр куни “Россиянинг Украинадаги урушни тинч йўл билан тугатиш жараёнига жиддий қизиқиши йўқ”лиги боис қўшимча санкцияларни жорий этди. Янги чекловлар “Лукойл” ва “Роснефть”дан ташқари уларнинг 34 та шуъба компанияларига ҳам тааллуқли. Шунингдек, “Лукойл” ва “Роснефть” улуши 50 фоиз ёки ундан кўп бўлган барча компаниялар ҳам блокланади.
Бундан бир ҳафта олдин Буюк Британия ҳам “Лукойл” ва “Роснефть”га нисбатан санкциялар қўллаган эди. Бу жазо чоралари активларни музлатиш, шунингдек траст хизматлари ва транспорт операцияларига чекловлар жорий этишни назарда тутади. Лондон изоҳлашича, “Роснефть” ва “Лукойл” Россия ҳукумати учун “ҳал қилувчи аҳамиятга эга” соҳа — энергетикада фаолият юритади.
