Ҳонгконгда турар жой мажмуасидаги ёнғин: камида 44 киши ҳалок бўлди

Чоршанба куни кундузи бошланган ёнғин аввало бамбукдан ясалган қурилиш ҳавозаларини қамраб олган, шундан сўнг баланд қаватли уйларнинг ташқи қисми орқали тез суръатда ёйилган. Ўт камида саккизта бинодан бештасини тўлиқ ёки қисман қамраб олгани айтилмоқда. Мажмуада тахминан 4,5–4,8 минг киши истиқомат қилади. 

Ҳалок бўлганлар орасида ёнғинни ўчиришда иштирок этган бир нафар ўт ўчирувчи ҳам бор – у маълум бир вақтда жамоаси билан алоқани йўқотган, кейинчалик кучли куйиш жароҳатлари билан топилган. Ўнлаб одамлар жароҳат олган, улардан камида 40–60 нафари оғир аҳволда экани айтилмоқда. 

Ҳокимият ёнғинга энг юқори – бешинчи даражали хавф тоифасини берди. Бундай тоифа Ҳонгконгда сўнгги марта 2008 йилда қўлланган эди, мутахассислар бу ҳодисани шаҳарнинг сўнгги ўн йилликлардаги энг ҳалокатли ёнғинларидан бири дея баҳоламоқда. 

Расмий сабаб ҳануз аниқланмаган. Аммо ёнғиннинг бамбук ҳавозалар ва ташқи девор материаллари орқали ғайриоддий тез суръатда тарқалгани қайд этилмоқда. Маҳаллий ОАВ маълумотларига кўра, айрим аҳоли бугунга қадар қурилишда ишлаётган ишчиларнинг чеккани ҳақида шикоят қилиб келган. Полиция ёнғин билан боғлиқ ҳолда уч нафар эркакни гумонланувчи сифатида қўлга олган. 

Ҳонгконг дунёнинг аҳоли энг зич яшайдиган шаҳарларидан бири бўлиб, юзлаб баланд қаватли уйлардан иборат. Илгари ўта ҳалокатли ёнғинлар кўп учрарди, аммо охирги ўн йилликларда ёнғин хавфсизлиги қоидалари кучайтирилгани сабаб бундай йирик фожиалар камайган. Ҳозирги воқеа эса хавфсизлик стандартлари ва қурилиш ишлари устидан назорат масаласини яна кун тартибига чиқармоқда.