Экологик стикерни энди онлайн олиш мумкин

Экологик тоифаси аниқланган автотранспорт воситаси учун экологик стикерни масофадан — Ягона интерактив давлат хизматлари портали (my.gov.uz) орқали расмийлаштириш имконияти яратилди. Стикер 10 кун ичида почта орқали манзилга етказиб берилади.

Фото: ЙҲХХ

Энди экологик стикер олиш учун ЙҲХХ идораларига бориш талаб этилмайди — ариза онлайн қабул қилинади. Хизмат тавсифига кўра, экологик стикер бепул тақдим этилади, етказиб бериш эса почта орқали амалга оширилади.

Қандай қилиб онлайн олинади?

my.gov.uz портали ёки мобил иловаси орқали:

қидирувга “Экологик стикер” деб ёзиб хизматни танлаш;
тизим шакллантирган маълумотларни текшириб, аризани тасдиқлаш.

Хизмат саҳифасида қайд этилишича, аризада почта орқали етказиб бериш манзили кўрсатилади ва почта харажатлари учун тўлов инвойси шакллантирилади.

Нархи ва етказиб бериш

Стикернинг ўзи ва ариза топшириш: бепул.
Почта орқали етказиб бериш: БҲМнинг 5 фоизи. Ҳозир БҲМ 412 000 сўм эканини инобатга олганда, 5 фоиз — 20 600 сўмни ташкил қилади.

Муддат: 10 кун.

Маълумот учун, хизматнинг ҳуқуқий асоси сифатида Вазирлар Маҳкамасининг 2025 йил 28 ноябрдаги 750-сон қарори кўрсатилган.