Хитой иқтисодиётидаги ўсиш суръатининг сустлашуви кўплаб Америка компаниялари, биринчи навбатда, Хитойга ускуналар ва хомашё етказиб бериш билан шуғулланувчилар катта зарар кўрмоқда. Бу ҳақда Wall Street Journal нашри сайтида хабар берилди.
“Чорак якунлари бўйича Америка компаниялари раҳбарлари йиғилишида дунёда иккинчи ўринни эгаллаб турган Хитой иқтисодиётининг секинлашуви натижасида келиб чиқувчи жуда жиддий қийинчиликлар тўғрисида сўз борди, – дейилади хабарда. – Жумладан, двигателлар ишлаб чиқарувчи Cummins компаниясининг маълум қилишича, иккинчи чорак якунларига кўра, Хитойда экскваторларга бўлган талаб ўтган йилнинг шу даврига нисбатан қарийб 34 фоизга камайган ва келгусида ҳолатнинг яхшиланиши бўйича ҳеч қандай ижобий аломатлар йўқ. Weyerhaeuser Co. сингари компаниялар учун Хитойдаги қурилиш ҳажмининг камайиши АҚШда ўрмон маҳсулотларига бўлган талабнинг пасайиши ва улар нархининг тушиб кетишига олиб келади.”
“Хитойдаги вазият сабабли компаниямизнинг Осиё-Тинч океани минтақасидаги даромади ўтган йилгига қараганда 3 фоиз камайган. Агар бу улуш Хитойга тегишли бўлмаганида, фойдамиз 11 фоизга ортар эди.”, деди тармоқ ускуналари ишлаб чиқаришга ихтисослашган Juniper Networks компанияси молиявий директори Робин Денхольд.
“Хитой ҳукумати иқтисодий ўсиш кўрсаткичини сўнгги 20 йил ичидаги энг паст 7 фоиз даражасида ушлаб туришга ҳаракат қилаяпти, – дейилади хабарда. – Бу жараён АҚШ бизнеси учун энг қийин вақтда содир бўлмоқда. Thomson Reuters маълумотларига кўра, акциялари S&P 500 индексига кирувчи компаниялар чораклик ўсиш кўрсаткичини 1,2 фоиздан юқори даражада қайд этишлари лозим. Бу 2012 йил кузидан буён энг паст рақам ҳисобланади.”
Хитой иқтисодиётидаги пастлашув ўтган чоракда АҚШдаги қарийб барча соҳа: лифтлар сотишдан тортиб, автомобиль ишлаб чиқаришгача салбий таъсир кўрсатди, дейилади хабарда.