Туркия парламенти бошқарувнинг президентлик шаклига ўтувчи конституция ислоҳотининг асосий бандларини тасдиқлади. Бу ҳақда Anadolu агентлиги хабар берди.

Асосий қонунга ўзгартиришлар киритиш лойиҳаси Туркияда республиканинг 1923 йилда ташкил топганидан буён мавжуд бўлиб келган парламент бошқаруви тизимининг ўрнига президентлик тизимини киритишни назарда тутади. Лойиҳа парламентга ҳукмрон адолат ва ривожланиш Партияси томонидан кўриб чиқиш учун киритилганди.

Тузатишлар президент ваколатини кенгайтиради. Хусусан, у фармонлар чиқариш, вазирларни тайинлаш, конституцияга оид ўзгартишлар масаласини референдумга олиб чиқиш ҳуқуқини қўлга киритади. Шу билан бир қаторда, давлат раҳбари партияга аъзолигини тўхтатмаслиги ҳам мумкин. Бу эса амалдаги нормаларга зиддир.

Туркия парламенти бандлар бўйича тузатишларни қабул қилганидан сўнг, уларни референдумга олиб чиқади. Бу ҳолат унга 330дан ортиқ депутат овоз берсагина юз беради. Кутилишича, АРП ҳамда миллий ҳаракат Партияси умумий ҳисобда парламентда 355 ўринга эга. 

Мухолиф Халқ-республика ва халқлар демократияси Партиялари эса Туркия президенти Тоййиб Эрдўғанни ягона ҳукуматни ўрнатишга интилишда айбламоқда.