Миср собиқ президенти Ҳусни Муборакнинг адвокати Фарид ад-Диб кассация суди йиғилиши вақтида эслатиб ўтдики, 2011 йил январида тинч аҳоли вакилларига уюштирилган ҳужумлар бўйича бундан олдин бўлиб ўтган суд жараёнларида "Мусулмон биродарлар" аъзолари айбланганди.

"Ал-Фажр" газетасида ёзилишича, адвокат Муборакнинг ҳимояси ютиб чиқиши кераклиги, чунки унга қўйилаётган айблар билан айбланган ИИВнинг собиқ раҳбари Ҳабиб ал-Адлий ва унинг ёрдамчилари тўла оқланганганини айтиб ўтган.

"Бундан олдинги кўплаб жиноий ишлар бўйича суд жараёнларида, апелляция ва кассация судларида полиция намойишчиларга ҳужумларга алоқадор эмаслиги исботланганди. Суд бундай ҳужумлар учун "Мусулмон биродарлар" ташкилотини ҳамда хорижий кучларни айбдор деб топган", дея эслатади адвокат.

Ҳусни Муборакнинг ўзи суд мажлиси вақтида ўзига қўйилаётган барча айбловларни тўла инкор этган.

Миср кассация суди Муборак учун бу ишдаги охирги босқич ҳисобланади ва у бу суд ҳукмидан шикоят билан мурожаат эта олмайди.

Эслатиб ўтамиз, 2012 йил 2 июнида Миср собиқ президенти Ҳусни Муборак ва ИИВнинг собиқ раҳбари Ҳабиб ал-Адлий умрбод озодликдан маҳрум этилган эди. Қоҳира суди 2011 йил январидаги инқилоб вақтидаги тинч аҳолининг ўлимига уларнинг алоқадорлиги исботланган, деб ҳукм чиқарган эди.

Бироқ 2013 йилнинг январида жиноят ишлари бўйича Миср суди ҳукм устидан Муборакнинг адвокатлари берган апелляцияни қаноатлантирди. 2014 йилнинг ноябрида эса Муборак ва унинг ўғилларидан намойишчилар ўлими ва коррупция жиноятлари бўйича барча айбловлар олиб ташланди.

ИИВнинг собиқ раҳбари ва унинг ёрдамчилари ҳам оқланди, бироқ бу қарор Миср аҳолисининг кескин норозилигига сабаб бўлди. Шундан сўнг Бош прокуратура, суд иши давомида процессуал қоидабузарликларга йўл қўйилганини маълум қилиб, суд ҳукми устидан шикоят қилди. Кўп ўтмасдан Миср суди Ҳусни Муборакни оқлаш ҳақидаги ҳукмни бекор қилганди.