Litsey bitiruvchilariga sertifikatlar topshiriladi

O‘zbekiston prezidenti qaroriga ko‘ra ta'lim sohasida yangi tartiblar o‘rnatiladi. Jumladan akademik litseylar bitiruvchilariga sertifikatlar beriladi.

«Akademik litseylar bitiruvchilariga aniq mutaxassisliklar bo‘yicha bilim va ko‘nikmalar berish ko‘zda tutilgan bo‘lib, ta'lim jarayoni yakuniga yetganidan so‘ng ularga davlat namunasidagi sertifikat beriladi», deyilgan «O‘rta maxsus, kasb-hunar ta'limi muassasalari faoliyatini yanada takomillashtirish chora-tadbirlari to‘g‘risida»gi qarorda. 

Qarorda ta'lim jarayoni sifatini oshirish va akademik litseylar bitiruvchilarining oliy ta'lim muassasalarida o‘qishni davom ettirishi uchun alohida chora-tadbirlar ishlab chiqilgan. Unda: 

akademik litsey o‘quvchilarining biriktirilgan oliy ta'lim muassasalari axborot-resurs markazlari va boshqa moddiy-texnik bazasidan foydalanish imkoniyatini kengaytirish; 

har bir akademik litseyda o‘quvchilarning individual qobiliyatidan kelib chiqib, ilg‘or pedagogik va axborot-kommunikatsiya texnologiyalari, elektron ta'lim resurslari, o‘quvchilarning ijodiy va mustaqil izlanishlariga yo‘naltirilgan dasturlarni ishlab chiqish; 

oliy ta'lim muassasalarining tajribali professor-o‘qituvchilarini akademik litseylarning pedagog kadrlariga patronaj sifatida biriktirish; 

oliy ta'lim muassasalari faoliyatiga baho berishda ular tomonidan ta'lim samaradorligini oshirish bo‘yicha akademik litseylar bilan hamkorlikda olib borilayotgan ishlarga alohida e'tibor qaratish nazarda tutilgan. Bu borada seminar-treninglar tashkil etish, ta'lim jarayoniga axborot-kommunikatsiya texnologiyalarini keng joriy qilish, xorijiy tillarni o‘zlashtirish, tajribali professor-o‘qituvchilar ishtirokida doimiy mahorat darslarini o‘tkazish, akademik litsey o‘qituvchilariga ilmiy-uslubiy yordam ko‘rsatish bo‘yicha olib borilayotgan ishlarni baholash mezonlarini ishlab chiqish kabi masalalar qamrab olingan. 

Bundan tashqari, qarorda akademik litseylar negizida bosqichma-bosqich tashkil etilayotgan kasb-hunar kollejlari uchun zarur ustaxonalarni barpo etish va jihozlash, shuningdek, soatbay asosida akademik litseylarda faoliyat ko‘rsatuvchi professor-o‘qituvchilarning oylik maoshini oshirish uchun davlat byudjyetidan zarur mablag‘lar ajratilishi ko‘zda tutilgan.