Австралиялик Анна исмли аёл бир йилдан кўпроқ вақт давомида ёғочдан ясалган кулонни (аёллар бўйин занжирига тақиладиган зийнат буюми)  унинг ичида никоҳ узуги борлигидан бехабар тақиб юрган. Унинг йигити Терри 2015 йилдаёқ бу тақинчоқни иккилари танишганларининг бир йиллиги муносабати билан туҳфа қилган. 

Терри кулонни Тасманияда ўсадиган Хуон қарағайидан ўйиб ясаган. У тақинчоқ ичига никоҳ узугини яшириб, бир йилдан кўпроқ вақт давомида Аннага турмушга чиқиш таклифини билдириш учун сабаб қидириб юрган.

2016 йил ноябрда Анна ва Терри анчадан бери боришни орзу қилиб юришган жой – Шотландияга саёҳатга боришганда Сму Кейв ғорига кираверишда Терри охир-оқибат кулон сирини фош қилишга қарор қилди. У Аннадан кулонни бўйнидан ечишни сўраган, сўнгра пичоқ билан уни очиб, севгилиси ёнида тиз чўкиб, унга турмушга чиқиш таклифини билдирган.

"Мен Сму Кейвни танлаганимнинг сабаби шундаки, биз учрашишни бошлаганимиздан бери шу жой ҳақида гаплашиб юрардик. Бунинг устига "smoo" сўзи норвегча "яширин жой" деган сўздан келиб чиққан. Шу сабабли, бу менга қўшимча туртки берди", деб айтди Терри.

Анна Террининг таклифига розилик билан жавоб берган. Айни вақтда жуфтлик уй учун пул жамғармоқда ва бу уйда ўз тўйини ўтказмоқчи.

Терри, шунингдек бу воқеанинг барча босқичлари: кулон тайёрланишидан бошлаб, Аннага билдирган таклифигача бўлган жараёнларни қамраб олган видеони намойиш қилди. Терри видео охирида Анна кулон сиридан хабардор бўлгандан кейин айтган сўзларни эслаб ўтди: "Узук шунча вақтдан бери унинг ичидамиди? Мен уни йўқотиб қўйишим мумкин эди-ку, тентак!".

Террининг айтишича, Анна энди у бераётган барча совғаларни синчковлик билан кўздан кечириб чиқади. "Энди мен Аннага нимадир берсам, у совға ичида бирор нарса яширилмаганмикин, деб уни текшириб чиқади", деб таъкидлаб ўтди Терри.