Шарқ мамлакатларининг ўзига хос маданиятини кўрсатиб берувчи жуда кўп воситалар мавжуд. Ана шулардан бири бозорлардир. Шарқ халқлари азал-азалдан ўз бозорлари билан фахрланиб келишган. Жумладан, ўзбек халқи ҳам. 

Андижон вилоятининг Балиқчи туманида бир бозор бор. Уни маҳаллий аҳоли “Эски бозор” деб ҳам атайди. Айтиш мумкинки, бу ер шартли равишда “бозор” атамасига мос тушади. Чунки тошли йўллар, растасиз, бетартиб жойлаштирилган маҳсулотлар, ёзда иссиқ, қишда намгарчилик туфайли ҳароб ҳолатга тушиб қолувчи бу ер на сотувчиларга ва на харидорларга ҳеч қандай қулайлик бермас эди. "Фейсбук" ижтимоий тармоғи фойдаланувчиларидан бири шу ҳақда сўз юритади.

Аммо мутасадди ташкилотлар аҳоли мушкулини осон қилиш мақсадида замонавий, янги қурилган бозорни фойдаланишга топширди.

Бундан севинган савдогарлару, тадбиркорлар у ердаги дўконлар ва расталарга бориб жойлашишди, тегишли тўловларни амалга оширишди. Аммо уларнинг қувончи узоққа чўзилмади.

Дабдурустдан пайдо бўлган давлат солиқ инспекцияси (ДСИ) ходимлари уларнинг буюмларини кўчага улоқтирадиган, йиғиштириб ташлашга мажбур қиладиган бўлишди. Сабабини сўрашганида, шундай жавоб қайтаришди: “Бу ерда савдо қилиш мумкин эмас? Эски бозорга бориб савдо қилиш керак”. Ишини энди бошлаб, савдо-сотиқ ортидан қора қозонимни қайнатай деганлар ҳам шу машмашага йўлиқишган.

Одамлар аросатда қолди, дўкон эгалари сарфлаган харажатлари ҳақида ўйлаб, бошлари қотди. Хўш, нега замонавий, тўла таъмирланган бозор туриб, эски, шароити йўқ, талабга жавоб бермайдиган бозорга бориб ишлаш керак? Ёки бундан кимдир манфаатдорми? Ноқонуний паттачилар ҳаракати, пул йиға-йиғлар ва яна бошқа моддий манфаатлар бу ерда тўқнаш келмаяптимикан? Хўш, агар шундай бўлмаса, нега энди бундай бемаъни ҳолат кузатиляпти?

Давлат раҳбаридан тортиб бошқа мутасадди ташкилотларгача, халқнинг ҳаётини енгил қилиш учун тиним билмай ишлашяпти. Турли чора-тадбирлар ҳаётга татбиқ этиляпти. Қонунлар ишлаб чиқиляпти, қарорлар қабул қилиняпти. Аммо юқоридаги кўнгилни ғаш этувчи ҳолатлар эса ҳамон давом этмоқда. Аммо ўйлаймизки, бундай манзаралар давомийлиги узоққа бормайди. Қонун ва тартиб, албатта, ўз сўзини айтади.