13 июнь куни Ўзбекистон Президенти Шавкат Мирзиёев «Хорижий инвестициялар иштирокидаги Uzbekistan Peugeot Citroen Automotive корхонасини ташкил этиш тўғрисида»ги қарорни имзолади. Қарор матни Президент расмий веб-сайтида жойлаштирилган.

Бундан аввалроқ, “Ўзавтосаноат” АК ва “Пежо Ситроен” Группаси ўртасида Ўзбекистонда енгил тижорат автомобилларини ишлаб чиқарувчи қўшма корхона барпо этиш бўйича келишув имзолангани ҳақида хабар берилган эди.  

Жами қиймати 133,3 миллион евро бўлган «Ўзбекистонда енгил тижорат автомобилларини ишлаб чиқаришни ташкил этиш» инвестиция лойиҳаси Жиззах вилоятидаги «Жиззах» ЭИЗ ҳудудида амалга оширилади. Қўшма корхонанинг устав капитали 29,3 миллион еврони ташкил этади. «Жиззах» ЭИЗ ҳудудида завод қурилиши учун 45 гектар ер майдони ажратилади.

Қарорга мувофиқ, 2018 йил 1 майга қадар инвестиция лойиҳаси доирасида қурилиш-монтаж ишлари амалга оширилади ва шу билан бир вақтда лойиҳа-смета ҳужжатлари ишлаб чиқилади.

Ўзбекистон раҳбари Ўзбекистон Республикаси ҳукумати, Peugeot Citroen Automotive S.A. ва «Ўзавтосаноат» АЖ ўртасида тузилган, Ўзбекистон ҳукумати томонидан UzPCA МЧЖга тақдим этиладиган хорижий инвесторнинг муайян мажбуриятларини ва давлат кўмаги бўйича чора-тадбирларни акс эттирувчи инвестиция битимини тасдиқлади.

Шавкат Мирзиёев лойиҳа иштирокчилари учун қатор солиқ ва божхона имтиёзларини ва преференцияларини тақдим этди.