Аргентинада собиқ президент Кристина Киршнерни давлатга хиёнатда айблаган собиқ прокурор Альберто Нисман ўз жонига қасд қилмагани, балки ўлдирилгани маълум бўлди. Бу ҳақда жандармерия баёнотига иқтибос келтирган ҳолда Nacion нашри хабар бермоқда

Маълумотларга кўра, 200 саҳифалик баёнотни тузишда иштирок этган турли соҳаларда фаолият юритувчи 24 мутахассис Нисманга икки киши ҳужум қилиб, унинг бошига уриб, сўнгра организмига кетамин киритиб, бошига ўқ узишгани ҳақидаги хулосага келишган. Уларнинг тадқиқотига кўра, прокурор ўлган вақт аввал айтилгандан фарқ қилади. Ҳужжат шу кунларда бош прокурор ва олий судьяга тақдим қилиниши керак.

Аввалроқ Аргентина олий суди мамлакатни 2007-2015 йиллар давомида бошқарган Киршнерга нисбатан Нисман билдирган давлатга хиёнат қилиш ва жиноятларни яшириш айблови билан тергов бошланишини қўллаб-қувватлаганди. Киршнер ҳимояси шикоят қилиб, ишни ёпишни талаб қилган. 

Нисман прокурор бўлган вақтда 1994 йилда Буэнос-Айресда яҳудийлар маданий марказидаги портлаш ишини тергов қилган. У Киршнер ва ташқи ишлар вазири Эктор Тимерманни портлашга алоқадор бўлганликда айбланаётган эронликларнинг "жазоланмаслигини таъминлаш мақсадида тил бириктирганликда" айблаган. Кейинроқ Нисман ўз хонадонида ўлик ҳолда топилган. Тергов ҳозирча бу ўз жонига қасд қилиш ёки суиқасд бўлгани борасида бир тўхтамга кела олмаяпти.