OAV: Argentinada sobiq prezident Kirshnerga ayblov qo‘ygan sobiq prokuror o‘ldirildi

Argentinada sobiq prezident Kristina Kirshnerni davlatga xiyonatda ayblagan sobiq prokuror Alberto Nisman o‘z joniga qasd qilmagani, balki o‘ldirilgani ma'lum bo‘ldi. Bu haqda jandarmeriya bayonotiga iqtibos keltirgan holda Nacion nashri xabar bermoqda. 

Ma'lumotlarga ko‘ra, 200 sahifalik bayonotni tuzishda ishtirok etgan turli sohalarda faoliyat yurituvchi 24 mutaxassis Nismanga ikki kishi hujum qilib, uning boshiga urib, so‘ngra organizmiga ketamin kiritib, boshiga o‘q uzishgani haqidagi xulosaga kelishgan. Ularning tadqiqotiga ko‘ra, prokuror o‘lgan vaqt avval aytilgandan farq qiladi. Hujjat shu kunlarda bosh prokuror va oliy sudyaga taqdim qilinishi kerak.

Avvalroq Argentina oliy sudi mamlakatni 2007-2015 yillar davomida boshqargan Kirshnerga nisbatan Nisman bildirgan davlatga xiyonat qilish va jinoyatlarni yashirish ayblovi bilan tergov boshlanishini qo‘llab-quvvatlagandi. Kirshner himoyasi shikoyat qilib, ishni yopishni talab qilgan. 

Nisman prokuror bo‘lgan vaqtda 1994 yilda Buenos-Ayresda yahudiylar madaniy markazidagi portlash ishini tergov qilgan. U Kirshner va tashqi ishlar vaziri Ektor Timermanni portlashga aloqador bo‘lganlikda ayblanayotgan eronliklarning "jazolanmasligini ta'minlash maqsadida til biriktirganlikda" ayblagan. Keyinroq Nisman o‘z xonadonida o‘lik holda topilgan. Tergov hozircha bu o‘z joniga qasd qilish yoki suiqasd bo‘lgani borasida bir to‘xtamga kela olmayapti.