Бугун, 3 октябрь куни Ўзбекистон Республикаси расмий ташрифи доирасида БМТнинг дин ва эътиқод эркинлиги ҳақидаги масалалар бўйича махсус докладчиси Аҳмад Шоҳид Ички ишлар вазирлигига борди.

Ички ишлар вазири Пўлат Бобожонов билан учрашувда томонлар бошқа масалалар билан бир қаторда озодликдан маҳрум этилган ва ҳибсга олинган шахсларнинг виждон эркинлигига доир конституциявий ҳуқуқларини таъминлаш масалаларини муҳокама этишди.

Қайд этилишича, маҳкумларга виждон эркинлиги тўлиқ кафолатланади ва уларга исталган динига эътиқод қилиш ёки бирортасига эътиқод қилмаслик ҳуқуқи тақдим этилади. Маҳкумлар олдига уларнинг илтимосига кўра, тегишли тартибда рўйхатдан ўтган диний бирлашмалар хизматчилари таклиф этилиши, диний урф ва маросимларни ўтказиш, диний анжомлар ва адабиётлардан фойдаланиш имконияти тақдим этилади.

Томонлар бугунги кунда ўтказилаётган кенг миқёсли ислоҳотлар натижасида Ўзбекистон озодликдан маҳрум этилган шахслар сони бўйича жаҳонда энг паст кўрсаткичлардан бирига эга эканлигини қайд этишди. Ҳар мамлакатнинг ҳар 100 минг аҳолисига 137 нафар маҳкум тўғри келади, бу эса МДҲ ва Европа давлатлари ҳамда АҚШга таққосланганида энг паст кўрсаткичлардан биридир.

Ўзбекистон пенитенциар муассасалари тўлганлиги 80 фоизга тенг, ҳолбуки жаҳондаги айрим давлатларнинг пенитенциар тизимларидаги асосий муаммо — қамоқхоналарнинг ҳаддан зиёд тўлганлигидир.

Бир кун олдин Аҳмад Шоҳид Адлия вазирлигида ҳам учрашув ўтказган эди.

Адлия вазирлиги раҳбарияти билан бўлиб ўтган учрашувда ушбу ташриф Ўзбекистон Республикаси Президенти Шавкат Мирзиёевнинг БМТ ва бошқа нуфузли халқаро ташкилотлар билан ҳамкорликни мустаҳкамлаш борасидаги ташаббусларининг амалий ижроси натижаси экани қайд этиб ўтилди.

Адлия вазири Ўзбекистон Республикасининг инсон ҳуқуқлари борасидаги халқаро миқёсда тан олинган принцип ва меъёрларга оғишмай амал қилишини алоҳида таъкидлаб ўтди.

БМТ махсус докладчиси А.Шоҳид мамлакатимиздаги бу борадаги муносабатларни тартибга солувчи ҳуқуқий база билан таништирилди.

Шу билан бир қаторда, Ўзбекистон дин давлат ва сиёсатдан ажратилган дунёвий давлат экани, диний ва бошқа кўринишдаги фанатизм ёки экстремизм, муносабатларни кескинлаштириш ва зиддиятлаштиришга қаратилган хатти-ҳаракатлар, турли конфессиялар ва секталар ўртасида нифоқ уруғини сочишга йўл қўйилмаслиги қайд этилди. Бундан ташқари, ҳуқуқий давлатларнинг аксариятида бўлганидек, диний ташкилотлар юридик рўйхатдан ўтиши ва шаффоф ҳисобдорлик юритиши керак.