«Реал» ярим ҳимоячиси Даниэль Себальос «ПСЖ» футболчиси Неймар билан Мадрид клуби шарафини биргаликда ҳимоя қилишга қарши бўлмаслигини айтиб ўтди. У Неймар аввал «Барселона»да тўп сургани аҳамиятга эга эмаслигини таъкидлаган.

Бундан аввалроқ «Реал» сардори Серхио Рамос Неймар билан жамоадош бўлишдан хурсанд бўлишини тан олганди.

«Рамос Неймарнинг «Реал»га келиши биз учун яхши бўлиши ҳақида айтдими? Мадрид клубида энг яхши футболчилар жамланади, Неймар эса шундай футболчилардан бири. Агар бизнинг сардоримиз шундай деган бўлса, Неймарга мен ҳам эшик очаман», — дея Себальоснинг сўзларини келтирган AS нашри.

Ўтган ҳафтадан испан нашрларида «Реал» келгусида Неймарни сотиб олмоқчилиги ҳақида хабарлар тарқалганди.