Argentinaning sobiq prezidenti sud oldida javob beradi 

Argentinaning sobiq prezidenti Kristina Fernandes de Kirshner va uning ma'muriyatida yuqori lavozimlarni egallaganlar 1994 yilda Buenos-Ayresda yahudiylar madaniyat markazida (AMIA) portlash tergovi bilan bog‘liq holda sud oldida javob beradilar.

Ma'lum qilinishicha, federal sudya Klaudio Bonadio sudga Kirshner, Argentinaning sobiq tashqi ishlar vaziri Ektor Timerman va boshqa ayblanuvchilar bo‘yicha ishni jo‘natadi.

Comercio nashri ma'lumotlariga ko‘ra, sud jarayoni sanasi hali belgilanmagan.

Kirshner va Timerman yahudiy markazidagi portlashga aloqadorlikda ayblanuvchi eronliklarning “jazolanmasligini ta'minlash” maqsadida til biriktirishda ayblanmoqdalar. 

Kirshner 2013 yilda prezidentligi vaqtida Argentina va Eron hukumatlari portlashni birgalikda tergov qilishga kelishib olgan “Hamfikrlik memorandumi”ni imzolagan. Bunga Argentinadagi yahudiylar jamoasi vakillari keskin qarshi chiqishgan. Ular hujjatni “konstitutsiyaga zid”, “Eronni oqlashga va terakt ijrochilarining jazolanmasligini ta'minlashga” qaratilgan deb atashgan.

Argentina mamlakat tarixida eng yirik teraktni tashkillashtirishda Eronning bir qator yuqori lavozimli shaxslarini, jumladan Eronning sobiq prezidenti Hoshimi Rafsanjoniy va hukumatning sobiq 7 nafar vakilini ayblab keladi, Eron hukumati esa bu ayblovlarni qat'iyan rad etib keladi. Terakt vaqtida 85 kishi halok bo‘lgan, 200 dan ko‘proq kishi jarohat olgan.