Reuters: Rossiya snaryadlar yetishmovchiligini hozircha qoplay olmaydi

Yaqin yillarda Rossiya artilleriya snaryadlarini ishlab chiqarishni yiliga 2 million donaga oshirishi mumkin, ammo Ukrainaga qarshi urush sharoitida hali ham ularning taqchilligini boshdan kechiradi. G‘arb davlatlaridan birining ismi sir qolishni istagan rasmiysi 8 sentabr, juma kuni Reuters agentligiga bergan intervyusida shunday fikr bildirdi. 

2022 yilda Rossiya qo‘shinlari Ukrainada 10-11 million dona snaryad ishlatgan, deb hisoblaydi Reuters manbasi. Uning so‘zlariga ko‘ra, Rossiya qo‘shinlari qiyin vaziyatga tushib qolgan. 

Rossiyaning mudofaa sektoriga kiritgan sarmoyalari yiliga 200 ga yaqin tank ishlab chiqarish uchun sharoit yaratishi mumkin, ammo bu raqam Moskvaning ehtiyojlarini qondirmaydi, dedi rasmiy. «Agar siz 2000 ta tankni yo‘qotsangiz, boshlagan joyingizga qaytishingiz uchun sizga o‘n yil kerak bo‘ladi», dedi u. Avvalroq g‘arb ekspertlari Rossiyaning snaryadlar va tanklar ishlab chiqarishning o‘sish potensialini ikki baravar past deb hisoblagan, deya ta’kidlaydi agentlik. 

Shoyguning KXDRga tashrifi haqida 

Rossiya mudofaa vaziri Sergey Shoyguning iyul oyida Shimoliy Koreyaga safari Moskvaning umidsizligini namoyish etadi, dedi rasmiy. Oq uyning ta’kidlashicha, Moskva Pxenyan yordamida qurol-yarog‘ zaxirasini to‘ldirishga harakat qilmoqda. Reuters manbasiga ko‘ra, Shimoliy Koreya kelishuv uchun qulay shartlarni muhokama qiladi. 

Rossiya harbiylarining Ukrainadagi yo‘qotishlari soni turlicha 

Qo‘shni davlatda harbiy harakatlar boshlanganidan beri Rossiya 4000 ta zirhli jangovar texnika (ZJT), 100 dan ortiq samolyotni yo‘qotdi va 270 ming kishi halok bo‘ldi hamda yaralandi, deya xabar beradi Reuters manbasi. U bu ma’lumotlarning manbasini keltirmadi. 

Ukraina Qurolli kuchlari Bosh shtabi 8 sentabr kuni o‘z tezkor hisobotida Rossiya armiyasi yo‘qotishlarini taxminan 267,5 ming kishiga baholadi. Bundan tashqari, Ukraina qo‘mondonligi yo‘q qilingan 4529 ta tank, 9726 ta zirhli jangovar mashina va 315 ta samolyot haqida ma’lumot berdi.

Rossiya tomoni oxirgi marta 2022 yil 21 sentabrda halok bo‘lganlar sonini e’lon qilgan. Rossiya Mudofaa vazirligi ma’lumotlariga ko‘ra, o‘sha vaqtga kelib, urush paytida 5937 rossiyalik askar va zobit halok bo‘lgan. Bundan tashqari, yanvar oyida Rossiya Mudofaa vazirligi egallab olingan Makiyivkada 89 nafar harbiy xizmatchining o‘limini tasdiqladi.