Yevroparlament 10 ming yevrodan ortiq miqdordagi naqd to‘lovlarni taqiqladi

Yevropa parlamenti pul yuvishga qarshi kurash chora-tadbirlari doirasida 10 ming yevrodan ortiq naqd pul to‘lovlarini taqiqlash uchun ovoz berdi. 24 aprel, chorshanba kuni Yevroparlament deputatlari milliy qonunchilikdagi bo‘shliqlarni yopish uchun mo‘ljallangan pul yuvishga qarshi umumevropa qoidalarini joriy etishni qo‘llab-quvvatladi.

Yirik naqd pul operatsiyalarini taqiqlashdan tashqari, yangi qoidalar hashamatli tovarlar sotuvchilaridan o‘z mijozlarining shaxsini tekshirishni va shubhali operatsiyalar haqida hokimiyatga xabar berishni talab qiladi. Qoidalarning qat’iylashtirilishi, jumladan, zargarlik buyumlari, hashamatli avtomobillar, shaxsiy samolyotlar va yaxtalar savdosiga ta’sir ko‘rsatadi. 

«Bavariya» yoki Dortmundning «Borussiya» kabi boy futbol klublari ham yangi reglamentga bo‘ysunadi. Uchinchi mamlakatlardan ko‘p milliard dollarlik sarmoyalar professional futbolda ko‘p uchraydi va shuning uchun Yevropada pul yuvish uchun ehtimoliy variant hisoblanadi. 

YeIning pul yuvishga qarshi kurash boshqarmasi Frankfurt-Maynda joylashadi

Bundan tashqari, rasmiylar kriptovalutalar bilan operatsiyalarni va 50 million yevrodan ortiq aktivlari bo‘lgan o‘ta boy odamlarning bank operatsiyalarini sinchkovlik bilan kuzatishi talab etiladi. Aksiyalarning kamida to‘rtdan biriga ega bo‘lgan kompaniya egalari butun Yevropa Ittifoqida ro‘yxatdan o‘tishi kerak. Bu choralar, xususan, rossiyalik oligarxlarni Yevropa Ittifoqi sanksiyalarini chetlab o‘tish imkoniyatidan mahrum etishga qaratilgan. 

Yangi qoida 2029 yilda kuchga kirishi kerak. Muvofiqlik uchun javobgarlik shtab-kvartirasi Frankfurt-Maynda joylashgan yangi Yevropa pul yuvishga qarshi kurash boshqarmasi (Anti Money Laundering Authority, AMLA) bilan kelishilgan holda milliy hokimiyat organlariga yuklanadi.