Toshkentda uy-joy kommunal xo‘jaligi yo‘nalishiga yangi rahbar tayinlandi

Obidjon Mo‘minov Toshkent shahar hokimining o‘rinbosari - Uy-joy kommunal xo‘jaligi bosh boshqarmasi boshlig‘i lavozimiga tayinlandi. Tayinlovga qadar u Qurilish va uy-joy kommunal xo‘jaligi vazirligi tizimida mas’ul lavozimda faoliyat yuritib kelgan.

Foto: uy-joy kommunal xo‘jaligi

Ma’lum qilinishicha, Mo‘minov Obidjon Odilovich poytaxtda uy-joy kommunal xo‘jaligi sohasini boshqarishga mas’ul yangi rahbar sifatida ish boshladi. U Toshkent shahar hokimining o‘rinbosari hamda Uy-joy kommunal xo‘jaligi bosh boshqarmasi boshlig‘i lavozimiga tayinlangan.

Obidjon Mo‘minov 1987 yilda Navoiy viloyatida tug‘ilgan. U oliy ma’lumotli mutaxassis bo‘lib, 2013 yilda Navoiy davlat pedagogika institutini tamomlagan. Shuningdek, 2024 yilda Rossiya Federatsiyasi prezidenti huzuridagi Rossiya xalq xo‘jaligi va davlat xizmati akademiyasi Davlat boshqaruvi oliy maktabi magistraturasini bitirgan.

Mehnat faoliyati davomida u qurilish va uy-joy kommunal xo‘jaligi tizimida turli mas’ul vazifalarda ishlagan. Xususan, ushbu tayinlovga qadar O‘zbekiston Qurilish va uy-joy kommunal xo‘jaligi vazirligida Ko‘p xonadonli uy-joy fondini boshqarish va ekspluatatsiya qilish tizimini muvofiqlashtirish hamda renovatsiya loyihalarini umumlashtirish departamenti boshlig‘i lavozimida faoliyat olib borgan.

Yangi tayinlov poytaxtda uy-joy kommunal xo‘jaligi sohasida amalga oshirilayotgan islohotlar, ko‘p qavatli uy-joy fondini samarali boshqarish, kommunal xizmatlar sifatini oshirish va renovatsiya jarayonlarini tizimli tashkil etishda muhim ahamiyat kasb etishi kutilmoqda.