Turkiya Jumhuriyati prezidenti Rajab Toyyip Erdo‘g‘anning O‘zbekistonga davlat tashrifi doirasida bugun Toshkentda O‘zbekiston – Turkiya biznes forumi ham o‘tkazildi. Unda har ikki davlat prezidentlari qatnashib, so‘zga chiqishdi.
O‘zbekiston prezidenti forumda yig‘ilgan turkiyalik tadbirkorlarga Toshkent shahrining yangi hokimi — Jahongir Ortiqxo‘jayevni tanishtirdi.
«O‘zbekiston tarixida birinchi marta, o‘zim ishongan ishbilarmonni Toshkent shahri hokimi etib tayinladim. Tarixda bunaqasi bo‘lmagan», — dedi Shavkat Mirziyoyev.
Minbarga chiqqan Toshkent shahar hokimi Jahongir Ortiqxo‘jayevni yig‘ilganlarga tanishtirar ekan, prezident yana shunday dedi:
«Bu yigit ham hozirgi islohotlarni tushunadigan, byurokratiyadan yiroq, O‘zbekiston [ishbilarmonlik muhiti]ga toza havo kirishiga, investorlarni qo‘llab-quvvatlashga, Toshkent shahrining ertangi kunini tasavvur qiladigan hozirgi zamonaviy [yoshlardan]. Bu bizning aksariyat rahbarlardan farqli o‘laroq, “raykom”, [kom]partiya kabi hech qaysi byurokratik tizimda ishlab ko‘rmagan. Bu — tadbirkor. Men mana shu tadbirkorni barcha hududlarimiz ichra ulushi eng katta hudud hisoblanuvchi Toshkent shahriga — ertangi kunimizni barpo etishda faqat tadbirkorlarga ishonishim bois, [hokim etib tayinlash to‘g‘risida] qaror qabul qildim. Tadbirkor — Toshkent shahar hokimi. Shu bois endi buning (J.Ortiqxo‘jayevning) ertadan boshlab ikki karra mas'uliyati ko‘payadi. Sizlarga (turkiyalik tadbirkorlarga) Toshkent shahrida biror to‘siq [paydo] bo‘lsa — buning vijdoniga havola bo‘ladi».
