Toshkent viloyatida «Mening birinchi uyim» dasturi amalga oshiriladi

Prezidentning “Mening birinchi uyim” dasturini amalga oshirish chora-tadbirlari to‘g‘risida”gi qarori loyihasi e’lon qilindi.

Qurilish va uy-joy kommunal xo‘jaligi vazirligi tomonidan Turkiya davlat kompaniyasi bilan hamkorlikda “Mening birinchi uyim” dasturi ishlab chiqilgan.

Toshkent viloyati hokimligi hamda Qurilish va uy-joy kommunal xo‘jaligi vazirligining “Mening birinchi uyim” dasturini birinchi bosqichini tajriba-sinov tariqasida Zangiota tumani “Turkiston” MFYda amalga oshirish to‘g‘risidagi taklifiga rozilik berilishi mumkin.

Dastur doirasida amalga oshiriladigan qurilish ishlarini muvofiqlashtirish uchun Qurilish va uy-joy kommunal xo‘jaligi vazirligi huzurida davlat muassasasi shaklidagi “Mening birinchi uyim” dasturini amalga oshirish direksiyasi tashkil etiladi.

Dastur doirasida:

• ko‘p kvartirali uy-joylar, yo‘l-transport, muhandislik-kommunikatsiya hamda ijtimoiy infratuzilma obektlarini samarali joylashtirish, loyihalashtirish hamda qurish ishlarini tashkil etish direksiya tomonidan amalga oshiriladi;
• ko‘p kvartirali uy-joylar, yo‘l-transport, muhandislik-kommunikatsiya hamda ijtimoiy infratuzilma obektlarini loyihalashtirish va qurish ishlarini amalga oshiradigan tadbirkorlik sub’yektlari tender savdolari asosida aniqlanadi.

Dastur doirasida quriladigan uy-joylar aholiga imtiyozli va bozor shartlarida realizatsiya qilinadi. Imtiyozli uy-joylar oxirgi 5 yil davomida mulk huquqi asosida uy-joyga ega bo‘lmagan oilalarga 15 foiz miqdorda boshlang‘ich to‘lov asosida 20 yil muddatga bo‘lib-bo‘lib to‘lash shartlarida realizatsiya qilinadi.

Uy-joy sharoitlarini yaxshilashga muhtoj bo‘lgan shaxslarga imtiyozli uy-joylar bo‘yicha boshlang‘ich to‘lovi bir qismini qoplash uchun – qat’iy belgilangan 32 million so‘m miqdorida, oylik to‘lovlarining bir qismini qoplash uchun – besh yil davomida har oylik qat’iy belgilangan 1 million so‘m miqdorida davlat budjeti hisobidan subsidiyalar ajratiladi.