Ertaga, 20 iyun kuni 2021/22 o‘quv yili uchun oliy ta'lim muassasalarining bakalavriat ta'lim yo‘nalishlariga abituriyentlarni onlayn ro‘yxatga olish boshlanadi. Jarayon 20 iyulgacha davom etadi.
Davlat test markazi xabariga ko‘ra, abituriyentlar telefon raqamini avtorizatsiyadan o‘tkazib, pasport ma'lumotlari, doimiy yashash manzili va tugatgan ta'lim muassasasi bo‘yicha ma'lumotlarni kiritishlari, shuningdek, imtiyozlari mavjud bo‘lsa, ularni tekshirishlari hamda chet tilidan milliy yoki xalqaro sertifikatga ega bo‘lsa, sertifikat ma'lumotlarini kiritishlari mumkin.
Ta'lim yo‘nalishlarini esa 2021/22 o‘quv yili uchun OTMlarga o‘qishga qabul qilishning davlat buyurtmasi parametrlari belgilanib, tillar kesimida tasdiqlanganidan so‘ng tanlash mumkin bo‘ladi.
Abituriyentlarni ro‘yxatga olish Davlat test markazining my.dtm.uz sayti va Yagona interaktiv davlat xizmatlari portali (my.gov.uz) orqali onlayn amalga oshiriladi.
Ro‘yxatga olish 20 iyulga qadar (20 iyul kuni ham) davom etadi. Unga qadar abituriyentlar o‘z ma'lumotlarini o‘zgartirishlari hamda chet tilidan milliy yoki xalqaro sertifikatga ega bo‘ladigan bo‘lsa, sertifikat ma'lumotlarini kiritishlari mumkin.
