«Tarixiy adolatning tiklanishi» - Xalqaro fan olimpiadalari g‘olibi bo‘lgan o‘zbekistonlik o‘quvchilar taqdirlandi

Fan olimpiadalarida g‘oliblikka erishgan o‘quvchilarning ustozlari esa marosimda Oliy va o‘rta maxsus ta'lim vaziri o‘rinbosari Yusuf Absoatov tomonidan topshirildi:

• Saida Valijonovaning o‘qituvchisi Ortiqboy Eshonqulov 100 mln 350 ming so‘m;
• Ravshanbek Karimovning o‘qituvchisi Dilbar G‘oyibova 55 mln 750 ming so‘m;
• Sardor Tojiboyevning o‘qituvchisi Bozormurod Abduvaxitov 55 mln 750 ming so‘m;
• Mirumid Mirakbarovning o‘qituvchisi Dilshod Xaydarov 55 mln 750 ming so‘m;
• Dilshodaxon Isayevaning o‘qituvchisi Baxtiyor Usmanov 55 mln 750 ming so‘m;
• Firdavs Sobirovning o‘qituvchisi Amin Saidov 33 mln 450 ming so‘m.

Tadbir davomida Sherzod Shermatov xalqaro fan olimpiadalarida g‘oliblikka erishgan o‘quvchilar shu paytga qadar o‘z vatanida munosib taqdirlanmay kelganiga e'tibor qaratib, mazkur taqdirlashni «tarixiy adolatning tiklanishi» deb atadi.

«Oldinlari faqat sportda o‘rin olganlar munosib kutib olinardi, taqdirlanardi. Ilm-fanda yutuq bilan kelganlarga esa faqat maqtov yorlig‘i berilardi. Endi xalqaro fan olimpiadalarida faxrli o‘rinlarni egallaganlarga ham katta miqdorda pul mukofotlari berilmoqda.

Bilasiz, o‘tgan yili prezident alohida qaror qabul qilib, xalqaro olimpiadalar bilan tizimli ishlashni yo‘lga qo‘yib bergan edi. Qaror bilan Xalq ta'limi vazirligi qoshida xalqaro olimpiadalar bilan ishlaydigan departament ham ochildi. Bu departament maktab va litsey o‘quvchilarining xalqaro olimpiadalarda ishtiroki va natijasi bo‘yicha ishlayapti. Ko‘z tegmasin, mana natijalari ko‘rina boshladi.

Yana bir e'tiborli jihati, endilikda faqat o‘quvchilar emas, ularni tayyorlagan o‘qituvchilar ham pul mukofoti bilan taqdirlanmoqda. Shu paytgacha biror o‘qituvchi o‘quvchisining natijasi uchun buncha pul olmagan.

Xo‘sh, bu ishlar nima uchun qilinmoqda? Yoshlarning motivatsiyasi uchun. Sportga motivatsiya bo‘lgandan keyin qancha yoshlarning sport bilan shug‘ullanishini ko‘rdik-ku. Mana endi ilmdagi g‘alabalar uchun ham motivatsiya berilyapti.

Yana bir eslatma, dunyoda turli xil kichik-kichik fan olimpiadalari bor. Bugungi yoshlar yutgan olimpiadalar ulardan keskin farq qiladi. Bu yutuqlar xuddi sport o‘yinlarida bo‘lgani kabi fan yo‘nalishidagi eng yirik olimpiadalarda qo‘lga kiritilgan», – dedi Xalq ta'limi vaziri.

Kun.uz muxbiri tadbir yakunida Toshkent pediatriya tibbiyot instituti qoshidagi akademik litsey direktori Ortiqboy Eshonqulov va litsey o‘quvchisi, oltin medal sohibi Saida Valijonova bilan qisqa intervyu uyushtirdi.

— Xalqaro olimpiadalardagi bu kabi yuqori natijalar o‘z-o‘zidan kelmaydi. Aytingchi, bu borada sizlarda qanday tizim tashkil qilingan?

Ortiqboy Eshonqulov:

— Litseyimiz o‘quvchilari shu kabi xalqaro olimpiadalarga 15 yildan beri qatnashib keladi. Shu yillar davomida litsey o‘quvchilari yiqqan medallar 72 taga yetdi. Bular bitta oltin, 20 ta kumush va 42ta bronza.

Bu o‘quvchilar va ularga bilim berib kelayotgan ko‘plab o‘qituvchilarning zahmatli mehnati natijasi.

— Fan olimpiadasi bu yil onlayn o‘tkazilgani aytildi. Bu jarayon qanday tashkil qilindi?

— Rosti, bu yil jarayonlar qiyinroq bo‘ldi. Bir tomondan kompyuterda savollar keladi. O‘quvchini kuzatib turish uchun bitta umumiy va yon tomondan yana bir kuzatuv kamerasi o‘rnatilgan.

O‘quvchilar laboratoriya jarayonida bajariladigan topshiriqlarni pandemiya sharoitidan kelib chiqqan holda kompyuter orqali bajarishdi. Bunda to‘rt yuzdan ortiq savollarga 75 bet atrofida javob yozish talab qilindi. Berilgan vaqt esa 5 soat. Bu vaqtda o‘quvchi hech qayerga qimirlashi kerak emas. 

Ikkinchi kuni esa olimpiada ishtirokchilari yuzdan ortiq test yechishdi. Bunda ham o‘quvchilarga besh soat vaqt berildi.

O‘quvchimiz biologiya fani bo‘yicha oltin medalni qo‘lga kiritdi. Kimyo fanida esa afsuski, 1 ball yetmay qoldi. Chunki o‘quvchimiz kompyuterga tikilib o‘tiraverish oqibatida juda charchab qolgan edi.

Saidaxon o‘tgan yili Vengriyaning Budapesht shahrida bronza medalini qo‘lga kiritgan edi. Biz shundan keyin bir yil davomida kamchiliklarimiz ustida ishladik va mana oltin medalga yetishdik.

— Saida, yutuqlar bilan samimiy tabriklayman. Taassurotlar qanday?

Saida Valijonova:

— Juda xursandman. Ota-onam, ustozlar va meni tanigan barcha insonlarni ishonchi, qo‘llab–quvvatlashi menga katta kuch bo‘ldi. Bizga pandemiya sharoitida olimpiadaga tayyorgarlik uchun yaxshi sharoitlarni yaratib berishdi. Busiz g‘oliblikka erisholmasdik, menimcha.