Davlat idoralarida ortiqcha maydonlar qisqartiriladi

O‘zbekistonda davlat idoralari tasarrufidagi maydonlardan samarali foydalanish maqsadida bir xodimga to‘g‘ri keladigan o‘rtacha maydonni 27 kvadrat metrdan 12–15 kvadrat metrgacha qisqartirish taklif etildi.

Foto: Prezident matbuot xizmati

Bu haqda prezident Shavkat Mirziyoyevga iqtisodiyotda davlat ishtirokini qisqartirish va xususiylashtirish jarayonlarini jadallashtirishga doir takliflar taqdimoti chog‘ida ma’lum qilindi.

Taqdimotda hududlarda davlat mulkidan oqilona foydalanish, bo‘sh turgan maydonlarni iqtisodiy faoliyatga jalb qilish bo‘yicha mavjud imkoniyatlar to‘liq ishga solinmayotgani qayd etildi. Shu munosabat bilan davlat ko‘chmas mulki obektlarini bosqichma-bosqich yagona boshqaruv tizimiga o‘tkazish taklifi ham ilgari surildi.

Qayd etilishicha, mazkur choralar orqali 4,9 million kvadrat metr maydonni iqtisodiy aylanmaga kiritish, bo‘sh binolarni savdo va ijaraga chiqarish, shuningdek, saqlash va kommunal xarajatlarni qisqartirish imkoniyati yaratiladi.