7 dekabr kuni Toshkent shahar hokimining Qo‘yliq dehqon bozori va unga tutash ulgurji savdo maydoni boshqa manzilga ko‘chirilishi haqidagi qarori e'lon qilindi. Unda aytilishicha, poytaxtdagi yo‘l infratuzilmasini yaxshilash, kommunikatsiya tarmoqlarini takomillashtirish va tirbandliklarning oldini olish rejalashtirilgan.
Bu yangilik ijtimoiy tarmoqlarda bahslarga sabab bo‘ldi. Kun.uz muxbiri O‘zbekistonning deyarli barcha viloyatlari bilan chambarchas bog‘liq ravishda oziq-ovqat mahsulotlari yetkazilishini ta'minlaydigan bu bozorda faoliyat yurituvchi tadbirkor va sotuvchilarning fikrini bilish, bozorning keyingi taqdiri haqida ma'lumot olish uchun Qo‘yliqda bo‘ldi.
Gapirishni istaganlar ko‘p edi - bozor ko‘chishi haqida xabar topgan sotuvchilar va tadbirkorlarning dardi ichida ekan. Ular bozor boshqa joyga ko‘chishidan keladigan salbiy oqibatlar haqida ogohlantirishdi. Bozor ko‘chishi mijozlar kamayishi va savdo susayishiga sabab bo‘lishini aytishdi, shuningdek, hozirda bu yerda chipta narxlari va transport qulayligi haqida ta'kidlashdi.
Mirhosil Akromov, tadbirkor:
«Bizga Food city majmuasidan ijaraga do‘kon olishimiz mumkinligini aytishgan. Lekin u yerning to‘lovlari sal qiyinlik qilarkan bizga. Hozir meva-cheva mahsulotlarimiz ko‘p. Shuni chiritmasdan xalqqa sotib olishimiz kerak. U yerga ko‘chsak sotolmasligimiz mumkin».
Hamdam Xo‘jamov, tadbirkor:
«Ko‘chishimiz haqida hozircha aniq gap aytilmadi. Lekin yangi qurilgan bozorga borib ko‘rdik. Bizga sharoitlari ma'qul kelmadi. Bu yerda bitta kameramiz 60 kv/metr. U yerdagi do‘konlar 20-25 kv/metr chiqar ekan. Mahsulotlarimiz sig‘maydi u do‘konlarga.
Bu bozorda ulgurji savdo bo‘lgani uchun mahsulotlarimizning asosiy qismini nasiyaga beramiz. Ko‘chadigan bo‘lsak, mijozlarimiz uchun ham qiyin bo‘ladi.
