Qo‘yliq bozori Toshkent viloyati hududiga ko‘chiriladi

Toshkent shahridagi Qo‘yliq dehqon bozori Toshkent viloyatining O‘rta Chirchiq tumanidagi Mehnatobod ko‘chasida joylashgan Food city savdo markaziga ko‘chirilishi kutilmoqda. Buni markaz mas'ul xodimi Kun.uz bilan suhbat vaqtida ma'lum qildi.

Bozor buzilishi munosabati bilan joysiz qolayotgan tadbirkorlarga Food city hududiga ko‘chish tavsiya etilmoqda - ko‘p yillar davomida bozorda ishlab kelganlarda boshqa tanlov ham yo‘q.

Food city savdo majmuasida do‘konlarning ijara huquqi asosida sotuvga qo‘yilishi 2021 yilning iyun oyidan boshlangan. Do‘konlar 19, 25 va 28 kv/metrdan iborat bo‘lib, boshlang‘ich bahosi 50 mln so‘mdan 100 mln so‘mgacha belgilangan.

Majmua vakili Kun.uz bilan suhbatda bu boshlang‘ich narx ekani, ijaraga do‘kon olish uchun 100 mln so‘mdan ortiq mablag‘ni garov sifatida qo‘yish kerakligi va oyiga 3,5 mln so‘mdan ijara to‘lovi borligini bildirdi.

«Qo‘yliq dehqon bozori» aksionerlik jamiyati va ulgurji savdo bozorining asosiy aksiyadori hisoblangan Toshkent shahar hokimligi bozor aynan qayerga ko‘chishi bo‘yicha rasmiy ma'lumot bermagan.

7 dekabr kuni shahar hokimligi Qo‘yliq dehqon bozori va unga tutash ulgurji savdo maydoni yo‘l kengaytirilishi sabab boshqa manzilga ko‘chirilishini ma'lum qilgandi.

Kun.uz so‘roviga javoban, shahar hokimiyatidagilar Qo‘yliqdagi ijara do‘konidan ajrayotgan tadbirkorlar Food city’dan ijaraga do‘kon olishlari mumkinligini aytish bilan cheklanishdi.

Gazeta.uz ma'lumotiga ko‘ra, Qo‘yliq bozoridagi tadbirkorlar markaz hududiga ko‘chish uchun o‘zlari murojaat qilishgan. 

Cavdo markazi 84ta futbol maydoniga teng hududda joylashgan bo‘lib, unda 2500 do‘kon va savdo rastalari, 2500ta avtomobil uchun avtoturargoh mavjud.

Markazda ayni paytda qishloq xo‘jaligi mahsulotlarini ulgurji va chakana sotish uchun savdo bozorlari barpo etilgan.

Ma'lumot uchun, ushbu savdo markazi Qo‘yliq bozorining hozirgi o‘rnidan 6,5 km masofada joylashgan. Eng yaqin metro Qo‘yliq 7-bekati hisoblanadi. U yerga 12, 15, 45, 54, 68, 81, 93, 110, 117, 119, 122, 130, 145, 183, 185 avtobus yo‘nalishlari ham qatnaydi.

Shuningdek, nafaqat Toshkentdan, balki boshqa viloyatlardan ham avtobuslar qatnovini yo‘lga qo‘yish maqsadida yirik transport uzellari barpo etilishi kutilayotgani aytilgan.