Ўзбекистон ҳудуди бўйича июнь ойи охирида кузатилган аномал иссиқ об-ҳаводан сўнг, кеча ва бугун иссиқ аста-секин пасайиб бормоқда.
Бугун кундузи республика бўйича ҳаво ҳарорати 35-38 даража иссиқ атрофида бўлади. Бу ҳақда “Ўзгидромет” хабар бермоқда.
Қайд этилишича, дам олиш кунлари иссиқ яна кўтарила бошлайди. Якшанба кунига келиб, ҳарорат 38-41 даража иссиққача етади. Ушбу кунларда жанубий ҳудудлар энг чекка қисмида 43-45 даража иссиққача бўлган ҳарорат билан жуда иссиқ об-ҳаво сақланиб туради.
Бу иссиқ узоқ вақт давом этмайди. Кейинги ҳафта бошидан республика ҳудудига Волгабўйи ҳудудларидан салқин ҳаво кириб келади. Душанба кунидан ҳарорат аста-секин пасайишни бошлайди ва ҳафта катта қисмида 30-35 даража иссиқ атрофида, баъзи жойларда 37-38 даража иссиққача бўлади.
Республика ҳудуди катта қисмида бугун ва дам олиш кунлари асосан кам булутли об-ҳаво кузатилади, фақат Қорақалпоғистонда 3 июлда қисқа муддатли ёмғир ёғиши, момақалдироқ бўлиши мумкин.
Республика бўйича баъзи жойларда шамол 15-20 м/с гача кучайиши, баъзи жойларда чанг-тўзонлари кузатилиши мумкин. 3 июлда шимолда ва чўл ҳудудларда шамол 23-28 м/с гача кучайиши мумкин.
1-3 июлда Фарғона вилояти тоғолди ва тоғли ҳудудларида гляциал (муз) сел-сув тошқин ҳодисалари юзага келиши мумкин.
