28 июль куни Ёзги Олимпиаданинг бешинчи кунги баҳслари ўтказилади. Эртанги баҳсларда яна 4 нафар ўзбекистонлик спортчи 2 спорт тури бўйича ўз омадини синаб кўради.
![](https://storage.kun.uz/source/7/UP6whX-OtBfzJD8iWC6FvBOO0Oio_GUG.jpg)
Шу куни икки нафар боксчи нимчорак финал жангларидан иштирокини бошлайди, дзюдочилар жамоасидан бир эркак ва бир аёл спортчи медаллар учун курашиб кўради.
Соат 07:00да -70 кг вазн тоифасида Ўзбекистон шарафини ҳимоя қилаётган дзюдочи Гулноза Матниёзова татамига чиқади. Унинг илк рақиби чадлик Демос Мемнелум бўлади.
Соат 07:45да эса Ўзбекистон дзюдо жамоасининг медал учун сўнгги умидларидан бири бўлмиш Давлат Бобонов (-90 кг вазн тоифасида) иштирокини бошлайди. Унга дастлабки жангида италиялик Николас Мунгай рақиблик қилади.
Ҳозирга қадар Шарофиддин Лутфуллаев (-60 кг), Сардор Нуриллаев (-66 кг), Ҳикматиллоҳ Тўраев (-73 кг), Шарофиддин Болтабоев (-81 кг), Диёра Келдиёрова (-52 кг) ва Фарангиз Ҳожиева (-63 кг) турнирни тарк этиб бўлди. Кейинги кунларда Муҳаммадкарим Хуррамов (-100 кг) ва Бекмурод Олтибоев (+100 кг) ўз омадларини синаб кўришади.
Бокс жамоасининг яна икки вакили чорак финал йўлланмаси учун жанг қилади. Соат 8:40да -57 кг вазн тоифаси вакили Миразизбек Мирзахалилов ирландиялик Курт Уолкерга қарши рингга кўтарилади.
Соат 16:30да эса -81 кг вазн тоифасида Дилшод Рўзметов озарбойжонлик Aлфонсо Домингесга қарши жанг бошлайди.
Бу Дилшод Рўзметовнинг Олимпиададаги иккинчи жанги бўлади. У 1/16 финалда ирландиялик Эммет Бреннанни 5:0 ҳисоби билан мағлуб этганди.
Бундан ташқари, Турсуной Раҳимова (+51 кг), Элнур Абдураимов (-63 кг), Шаҳобиддин Зоиров (-52 кг) ва Фанат Қаҳрамонов (-75 кг) ҳам илк жангларда ғалабага эришиб, 1/8 финалга чиққанди. Бугун Ўзбекистон бокс жамоасининг яна бир вакили Бобо-Усмон Ботуров (-69 кг) 1/4 финал йўлланмасини ҳал қилди. Санжар Турсунов (-91 кг) эса илк рақибга мағлуб бўлиб, турнирни 1/16 финалдаёқ тарк этганди. Шаҳноза Юнусова (-69 кг) илк жангда муваффақиятсизликка учраган.
Ўзбекистон делегациясининг Олимпиада ўйинларидаги байроқдори, +91 кг вазн тоифаси вакили Баҳодир Жалолов эса иштирокини 29 июль куни бошлайди. Шунингдек, -60 кг вазн тоифаси вакили Райҳона Қодирова ҳам илк жангига тайёрланмоқда.
Ўзбекистон делегацияси ҳозирча бир олтин медал билан умумий рейтингда 23-ўриндан жой олиб турибди.