Тошкент шаҳар меъморчилик ва қурилиш бош бошқармаси аҳоли яшайдиган даҳаларида 30дан ортиқ кўп сатҳли автомобиль тўхташ жойлари ўрнатиш бўйича таклифлар ишлаб чиқди. Бу ҳақда бошқарманинг Uz24 сайтига йўллаган мактубидан маълум бўлган.
Таъкидланишича, тўхташ жойлари очиқ ва ёпиқ турда бўлиши мумкин. Аммо бунда маълум тартиб-қоидаларга риоя қилиниши керак, жумладан, автомобиль тўхташ жойлари уйлардан маълум масофадан жойлашиши керак.
Гаражлар бузиб ташланган тақдирда уларнинг эгасига янги тўхташ жойларида бепул жойлар тақдим қилинади. Ҳар бир жойда автомобиль эгасининг уй манзили ва машинанинг давлат рақами кўрсатилади.
Шунингдек, бундай тўхташ жойларида бўш қолган ўринлар ижара асосида вақтинчалик қўлланилиши ҳам мумкин бўлади. Бундай хизматни кўрсатиш учун касса аппарати ва банк картаси учун терминалнинг бўлиши талаб қилинади.
