Лондоннинг “Челси” жамоаси ҳужумчиси Дидье Дрогба Англия чемпионатининг сўнгги турида ўтказиладиган “Сандерленд”га қарши учрашув жамоа сафидаги ўзининг охирги учрашуви бўлишини маълум қилди. Бу ҳақда жамоанинг сайтида хабар берилмоқда.
Бироқ ҳужумчи фаолиятини якунлаш ниятида эмаслигини таъкидлаб ўтди. “Мен камида яна бир йил ўйнамоқчиман, бироқ бунинг учун мен жамоани алмаштиришим керак. Барча менинг “Челси”ни жуда яхши кўришимни билади, шунинг учун мен клубга келажакда бошқа ролда қайтишимга умид қиламан”, деб айтди Дрогба.
“Челси” ва “Сандерленд” ўртасидаги учрашув 24 май куни “Стэмфорд Бриж” ўйингоҳида бўлиб ўтади.
37 ёшли код-д-ивуарлик футболчининг жамоа билан шартномаси шу ёзда ниҳоясига етади.
Дрогба “Челси” сафида 2004-2012 йиллар давомида тўп сурган ва мавсум бошидан олдин клуб сафига яна келиб қўшилган. Ҳужумчи жамоа таркибида 253 та ўйинда 104 та тўп уришга муваффақ бўлган.